Нийслэлийн прокурорын газрын орлогч Е.Сагсай “МАХН-ын дарга Н.Энхбаярыг долоон сар шалгаж, яллах дүгнэлт үйлдэн шүүхэд шилжүүллээ” хэмээн мэдэгдэв. Үүнтэй зэрэгцэн АТГ-ынхан мөн МАХН-ын дарга байсан Санжаагийн Баярыг мөрдөн шалгаж эхлэсэн тухай мэдээлэл тархлаа.

   Түүний томилгоогоор АМГ-ын дарга болж дураар дургиж асан Д.Батхуягийг авлигын томоохон хэрэгт сэжиглэн барьж хорьсон явдалтай энэ шууд холбоотой юм.

   Д.Батхуяг С.Баярын нөмөрт дураар аашлан, хууль бусаар лицензийг олноор олгосон нь нотлогдож эхлэсэн үеэс Ерөнхий сайд болоод удаагүй Сү.Батболд түүнийг ажлаас чөлөөлөх гэж нэг бус удаа оролдсон байна. Гэвч өвчтэй гээд явсан С.Баяр алсаас тээг тавьж чадсан байна. Харин Д.Батхуягийн албан тушаал арааны шүлсийг нь асгаруулаад байсан тул “ажлаас нь заавал чөлөөлнө” гэж улайран зүтгэсэн хүн нь ЗГХЭГ-ын дарга Ч.Хүрэлбаатар ажээ. Түүнд АМГ-ын даргын суудлыг сонирхох олон шалтгаан байсан, адаглаад л Увс аймгийн Бөхмөрөн суманд байдаг хэл ам татласан уурхайгаа баттай нөхцөлд оруулах хүсэл оргилж байсан цаг.  Ч.Хүрэлбаатар тэр цагт хэвлэлд ярилцлага өгч “ЗГХЭГ-ын даргын хувьд нэг агентлагийн даргыг ажлаа өг гэж хэлэх эрхтэй. Өргөдлөө өг гэж хэлсэн. Харин Д.Батхуяг үүний дараачаас өдөр алгасахгүй миний тухай сөрөг мэдээллийг төлбөртэйгөөр хэвлэлүүдээр цацаж байна. Тэр нөхөр яасан ч их мөнгөтэй юм. Би тэрнээс агентлагийн даргаас халагдах өргөдлийг нь заавал авна гэдгийг танай сониноор дамжуулаад шулуухан хэлчихье” хэмээн заналхийлж байв. Д.Батхуяг удалгүй огцорч С.Баяр, Ч.Хүрэлбаатар хоёр харилцаа хүйтэрчээ.

   Д.Батхуяг ажлаас чөлөөлөгдмөгцөө Хөвсгөл аймагт УИХ-ын сонгуульд нэр дэвшихээр бэлтгэж, тэр хавиас салахаа больсон байна. Нэр дэвших, Ерөнхий сайдын орон тооны бус зөвлөх болох гэсэн хоёр тохиролцоогоор тэр ажлаа өгсөн юм. Сонгуульд өрсөлдөхөөр ажиллаж байтал өмнө тарьсан хэргүүдийг нь хамтран зүтгэгч MCS Л.Энх-Амгалан сэм сөхөж, АТГ-т мэдээлэл хүргүүлснээр ноцтой хэрэгт татагдан саатуулагдаад байгаа юм. “Саус гоби сэндс” компанид хууль бусаар лиценз олгосон хэрэгт Д.Батхуягийг шалгаж байгаа, лицензийг С.Баярын зааварчилгаагаар нэр бүхий хоёр улс төрчид өгсөн гэдгээ эхний мэдүүлгээр өчсөн гэнэ. SGS компанийн хувь эзэмшигч, ханган нийлүүлэгч “Моннис” групп энэ хэргийн төвд байгааг АТГ тодорхойлж, баримт бүрдүүлж эхэлсэн сурагтай. Тодорхой болсон баримтаар бол Овоот толгойн ордоос хил хүртэлх 24 км авто замыг улсын төсвийн хөрөнгөөр Моннис групп барьж өгсөн бөгөөд үүний ачаар SGS компанийн хувьцаа Хонконгийн бирж дээр өсч, улмаар Чалко компани 60 хувийг нь худалдан авч байгаа билээ. Автозамын тендерийн асуудлыг сөхөхөд л энэ хэрэгт Сү.Батболд, С.Баяр нар холбоотой болох сэжүүр гарч эхлэсэн байна.

   Гол нь Д.Батхуяг алба хаших хугацаандаа нийт ашигт малтмалын 192 тусгай зөвшөөрөл хууль бусаар олгосон хэрэгт буруутгаад байгаа. Д.Батхуягийг мэдүүлэг өгч эхэлмэгц өнгөрсөн баасан гаригт Ерөнхий сайд асан С.Баяр АНУ-руу яаран нисчээ. Ерөнхийлөгч асан Н.Энхбаярыг АТГ баривчилсан үйл явдал С.Баярыг сүүл хавчин зугтахад хүргэсэн байж ч мэдэх. Түүнийг үйлийн үр нь ороож, Н.Энхбаярын адил нүглээ эдлэх хувь тавилан хүлээж байгааг үгүйсгэх аргагүй юм.