Өчигдөр ХБНГУ-аас Монгол Улсад суугаа бүрэн эрхт элчин сайд Петер Шаллерыг Монгол Улсын Ерөнхий Прокурор Д.Дорлигжав хүлээн авч уулзжээ. Тус уулзалтаар Монгол Улсын Ерөнхий Прокурорын газар болон ХБНГУ-ын Ерөнхий прокурорын газрын хооронд эрүүгийн хэргийн талаар эрх зүйн туслалцаа үзүүлэх гэрээ байгуулах, мөн энэ оны зургадугаар сард Ерөнхий Прокурор Д.Дорлигжав ХБНГУ-д хийх албан ёсны айлчлалын товын талаар тус тус санал солилцсон байна.
Мөн ХБНГУ-ын элчин сайд Петер Шаллер сүүлийн үед хэвлэл мэдээллийн хэрэгслээр Монгол Улсын Ерөнхийлөгч асан Н.Энхбаярын хэргийн талаар нотлох баримтгүй, үнэн худал нь мэдэгдэхгүй олон мэдээлэл цацагдаж байгаатай холбогдуулан Ерөнхий Прокурор Д.Дорлигжаваас Уг хэргийн талаар тодруулсан бөгөөд Ерөнхий Прокурор түүний асуултад: “Уг хэргийн тухайд мөрдөн байцаах ажиллагаа хуульд заасан үндэслэл журмын дагуу шүүхийн шийдвэрийн хүрээнд явагдсан. Энэ талаар зохих мэдээллийг холбогдох байгууллага, албан тушаалтан, олон нийтэд ил тодоор мэдээлж, танилцуулж байгаа болно” гэжээ.
Б.Чимэг
