МУГЖ, дуучин С.Жавхлан БНСУ-д эмчлүүлж буй МАХН-ын дарга Н.Энхбаярыг эргэж очжээ. С.Жавхлангийн хувьд МАХН-ын гишүүн бөгөөд Н.Энхбаярын дотны дүү нь гэдэг. Тэрбээр 2012 оны сонгуулийн өмнө тус намд элсэн орсон юм.

Энэ сарын 1-ны өдөр буюу хүүхдийн баяраар МАХН-ын дарга Н.Энхбаярыг Монголоос олон хүн очиж эргэжээ. Тодруулбал, УИХ-ын гишүүн, МАХН-ын дэд дарга Д.Тэрбишдагва түүнийг эргэж очиж биеийн байдлыг нь асуусан гэдэг. Харин энэ удаад дуучин С.Жавхлан эргэж очсон нь энэ. Тэд "Монгол таун"-д оройн хоол хамт идэж, гадуур зугаалсан байна.

Ирэх сонгуульд тэднийг хамтрах талаар ярилцсан гэх мэдээлэл байна. С.Жавхлан 2016 оны парламентын сонгуульд нэр дэвшихээ өмнө нь мэдэгдэж байсан. Тиймээс эртнээс намын даргынхаа туслалцааг авахаар хөөцөлдөж эхэлсэн байх магадлалтай.

Сонгууль дөхөж, улс төрд горлигсод хөдөлгөөнд орсны илрэл энэ биз ээ.

Т.Энхэлээ