ОХУ-ын “Россия” театрт Москвагийн олон улсын 37 дахь кино наадам хоёр дахь өдрөө үргэлжилж байна.
Энэхүү кино наадмыг Францын кино найруулагч Жан-Жак Анногийн найруулсан “Чонон сүлд” киногоор нээжээ. Тэрбээр Москвагийн олон улсын кино наадмын шүүгчдийн бүрэлдэхүүний даргаар сонгогдон ажилладаг юм байна. Кино наадамд нийтдээ 12 кино оролцож байгаа аж.
Хятадын зохиолч Зян Руны романаас сэдэвлэн бүтээсэн "Чонон сүлд" кино нийт 28 сая долларын өртгөөр бүтсэн. Киноны хөгжмийг Грэмми болон Оскарын шагналт хөгжмийн зохиолч Жэймс Хорнер бичсэн билээ. Тэрээр “Titanic”, “A beautiful mind”, “Avatar” зэрэг дэлхийд алдартай олон киноны хөгжмийг зохиосон юм.
Найруулагч Жан-Жак Анно “Чонон сүлд” романыг би анх 2007 онд уншсан. Үүний дараа Хятадын төлөөлөгчид намайг урьж, 2008 онд Монголд очсон. 2009 онд бид энэ кинонд зориулж чонын бэлтрэг тэжээж эхэлсэн. Зураг авалтаа бид 2012 онд эхэлж, 2013 оны 12 дугаар сард дуусгасан.
Би киног бүтээхэд нийтдээ долоон жил орчмын хугацаа зарцуулсан” хэмээн ярьжээ. Түүний ярьснаар, “Чонон сүлд” кинонд компьютер график бараг ашиглаагүй бөгөөд зургийг Өвөр Монголд авсан аж. Москвагийн олон улсын 37 дахь удаагийн кино наадам энэ сарын 26-ны өдрийг хүртэл үргэлжлэх юм байна.
