ҮДБЭЧ-ын 65 жилийн ой энэ жил тохиож байна. Өнөөгийн Үндэсний дуу бүжгийн  эрдмийн чуулга нь өнгөрсөн хугацаандаа байгууллагынхаа нэршлээ “Эстрад концертын товчоо”, “Ардын дуу, танц, үндэсний хөгжмийн ансамбль”, “Ардын дуу танцны Улсын ансамбль”, “Ардын дуу бүжгийн Улсын чуулга”, “Улсын ардын дуу бүжгийн чуулга” хэмээн хэд хэдэн удаа өөрчилж иржээ. 1950 оны 12-р сарын 01-нийг тус чуулга байгуулагдсан түүхэн он гэж тооцож өнөөг хүрчээ.

Тэмдэглэлт ойгоо тохиолдуулан тус чуулга зуны улиралд өдөр бүр 18:00 цагаас “Монгол урлагийн гайхамшиг” нэртэй ардын урлагийн цогц үзүүлбэрүүдийг толилуулж байна. Энэхүү тоглолт 2015- оны 9 сарын 20-ийг дуустал өдөр бүр үргэлжлэх аж.

Чуулга нь үүсч хөгжсөн цагаасаа өнөөдрийг  хүртэл улс орныхоо гадаад харилцаанд чухал байр эзлэн, Монгол улсынхаа нүүр царайг Ази, Африк, Америк, Европ тивийн олон улс оронд илтгэн харуулах, монгол ардын уламжлалт урлагаа сурталчлан таниулах хүндтэй бөгөөд хариуцлагатай, “ардын дипломат”-ын үүргийг нэр төртэй гүйцэтгэж ирсэн. Чуулгын уран бүтээлчид айлчлан тоглосон орныхоо дуу хуур, хөгжим, бүжгийг уран чадварлаг тоглоод зогсохгүй олон улсын өндөр хэмжээний уралдаан тэмцээн, наадмуудын алт, мөнгө, хүрэл медалиуд болон тусгай шагналууд, олон улсын ардын урлагийн наадмуудаас удаа дараа Гран-При болон бусад шагналуудыг хүртэж ирсэн юм.

Д.Дуулим