Өнгөрсөн долоо хоногт Казахстан улсын Акмолин мужид таван настай охиныг хүчирхийлсэн жигшүүрт хэрэг гарчээ. Хэргийг 1976 онд төрсөн,  36 настай Монгол улсын харьяат үйлдсэн хэмээн тус улсын хэвлэлүүдээр мэдээлж байна.
    Өнгөрсөн долоо хоногт Казахстан улсын Акмолин мужид таван настай охиныг хүчирхийлсэн жигшүүрт хэрэг гарчээ. Хэргийг 1976 онд төрсөн,  36 настай Монгол улсын харьяат үйлдсэн хэмээн тус улсын хэвлэлүүдээр мэдээлж байна.

    Акмолин мужийн дотоод явдлын газрын хэвлэлийн албаны мэдээнд дурьдсанаар, “Целиноград дүүргийн Кояны тосгонд оршин суугч эмэгтэй Астана хот руу очиж, мах зарчихаад гэртээ иржээ. Гэрт нь таван настай охин нь байхгүй, нөхөр нь гүн согтолтын байдалтай унтаж байсан аж. Удалгүй охин гэрийнхээ хажууханд зулгаралт шархны ул мөртэй олджээ. Цагдаагийн байгууллагад мэдэгдсэний дагуу Караганда мужийн Сарани хотод түр хугацаагаар оршин суугаа Монгол улсын иргэн бага насны охиныг хүчирхийлсэн болохыг тогтоов. Тэрээр охины эцэгтэй согтууруулах ундаа уусны дараа баригдаж дуусаагүй барилга дотор охиныг дагуулж очин хүчирхийлсэн байна” гэжээ.
    Мөрдөн байцаалтын явцад сэжигтэн “Би юу ч санахгүй байна” хэмээн мэдүүлсэн боловч удалгүй хэргээ хүлээсэн байна. Түүнчлэн охины эцгийг зориудаар согтоож, унтахыг хүлээж байгаад жигшүүрт хэргээ үйлдсэн гэж цагдаагийнхан үзэж байна. Сэжигтэнд хуулийн дагуу бага насны хүүхэд хүчирхийлсэн зүйл ангиар эрүү үүсгэж, 8-15 жилийн ял төлөвлөжээ.
    Харин Монгол улсын Гадаад харилцааны яамны Консулын газрын дарга Д.Ганхуягаас 24tsag.mn энэ талаар тодруулахад “Одоогоор манайд ямар нэгэн мэдээлэл ирээгүй байна” гэв.
    Олныг цочроосон жигшүүрт  хэрэгтэй холбогдуулан Казахстаны сенатын гишүүн Дани Касымов хүүхэд хүчирхийлсэн жигшүүрт хэргийн эсрэг оногдуулах ял шийтгэлийг чангаруулах талаар Ерөнхий сайд Карим Масимовт хүсэлт гаргасан байна. “Химийн аргаар үргүй болгох, засах аргаар шийтгэлийг чангаруулах нь зүйтэй. Эсвэл бүх насаар нь хорих шийтгэлийн аль нэгийг сонгох хэрэгтэй” гэж тэрээр үзэж байна. Мөн ийм төрлийн хэргийн улмаас ял эдлээд суллагдсан хүмүүсийг хүүхдийн байгууллагад ажилд авахыг хориглох ёстой гэж үзсэн байна.
    Сүүлийн үед Казахстан улсад хүүхэд хүчирхийлэх хэрэг нэмэгдэх хандлагатай байгаа бөгөөд Дотоод явдлын яамны мэдээллээр 2011 оны эхний есөн сарын байдлаар энэ төрлийн 111 хэрэг бүртгэгдсэн нь өнгөрсөн оныхоос 17-гоор илүү байна гэсэн судалгаа бий.
Оросын төрийн дум өнгөрсөн аравдугаар сарын 4-нд ерөнхийлөгчийн санаачилсан хүүхдэд донтогсдыг насаар нь хорих болон эмнэлгийн аргаар засаж хөнгөлөх тухай хуулийг анхны хэлэлцүүлгээр хэлэлцэн баталжээ.
   Мөн саяхан Английн Франклэнд шоронд хуягууд ийм төрлийн гэмт хэргийн улмаас ял эдэлж байсан 23 настай Нитчелл Харрисоны сэглээд хаясан шарилыг олжээ. Мөрдөн байцаалтын ажиллагаа явуулахад өрөөнийх нь хоригдлууд түүнийг бага насны хүүхэд хүчирхийлсэн хэмээн зодож хөнөөсөн байсан аж.