АНУ-ын Калифорн мужийн Ирвин хотод 3 өдрийн турш явагдаж байгаа Дэлхийн Нигүүлсэнгүй Үйл Хэргийн Чуулганы үеэр Дээлхийн Гэгээнтэн Далай Ламын 80 насны төрсөн өдрийг тэмдэглэн өнгөрүүлсэн байна. Өнгөрсөн ням гаригт эхэлсэн энэхүү чуулган өчигдэр өндөрлөсөн юм. Далай Лам чуулганы 3 өдрийн бүхий л арга хэмжээнд оролцож, энэ үеэрээ дэлхий нийтийн нигүүлсэнгүй үйл хэрэг, бүтээлч байдал, урлаг соёл, залуучуудын манлайлал болон уур амьсгалын өөрчлөлт зэрэг өргөн сэдвээр оролцогчдод үг хэлсэн байна.

Америкийн нэр хүндтэй их сургуулиудын тоонд багтдаг Калифорнийн Их Сургуулийн салбар болох Сан Диего хотноо байрлах Далай Тэнгис Судлалын Хүрээлэнгийн эрдэмтэн судлаачид далайгаас шинээр илрүүлж нээсэн төрөл зүйлээ Далай Ламын нэрээр нэрлэсэн байна. Тус их сургуулиас түүнд энэхүү шинэ төрөл зүйлийн нэршлийн талаарх дурсгалын самбарыг энэ үеэр мөн гардуулсан байна.

Түвдийн шашны тэргүүн, 14 дүгээр Далай Лам 1935 оны 7 дугаар сарын 6-ны өдөр Амдо мужийн Дагцэр тосгонд мэндэлсэн юм. Тэрээр 1950 оны 11 дүгээр сарын 17-нд 14 дүгээр Далай Ламаар өргөмжлөгдөж байсан билээ.