Хоёр мандаттай Дорнод аймагт УИХ-ын гишүүн “салаавчтай монгол ёсолгоо” Ц.Шинэбаяраас бусад нь дандаа шинэ хүмүүсийн нэр сонсогдож байна. ИЗНН-аас “Дорнод нутаг клуб”-ыг үүсгэн байгуулагч, “Монгол 999” нэгдлийн ТУЗ-ийн гишүүн С.Отгонбаатарын нэр хамгийн түрүүн баталгаатай өрсөлдөхөөр тодроод байгаа юм.  Мөн “Дорнод гурил” компаний захирал, аймгийн ИТХ-ын гишүүн Х.Болорчулуун МАН-ын гишүүн ч энэ жил бие даан нэр дэвшихээр бэлдэж эхэлжээ.
   
   МАН-ын хувьд энэ тойрогт шинэхэн сайд нараа сойгоод байна. Нийгмийн хамгаалал, хөдөлмөрийн дэд сайд Н.Номтойбаяр, Боловсрол, соёл шинжлэх ухааны дэд сайд Б.Ундармаа нэр зүслэгдсэн тойргоо аль хэдийн тойглоод эхэлсэн байна. Харин АН-ын хувьд АН-ын ҮЗХ-ны гишүүн, “Глобал удирдагч сан”-ийн тэргүүн асан Б.Отгонбат болон Хөдөлмөр халамжийн үйлчилгээний газрын дэд дарга асан Б.Мөнхцэцэг нарыг дэвшүүлэхээр орон нутгаас нэр нь ирээд байна. МАХН-аас Геологи, уул уурхайн үйлдвэрийн сайд асан, доктор Ч.Хурцыг сойхоор болжээ.

    Энэ жагсаалтанд Хамуг Монгол Хөдөлмөрийн намын цэцийн гишүүн, УИХ-ын гишүүн Ц.Шинэбаярын нэр баттай орно. Түүнтэй нэг сонгуулиар буюу 2008 онд УИХ-д хамт орж ирсэн МАН, АН-ын хуучин гишүүд дахин тойргоосоо дэвшихгүй бололтой. Д.Одбаяр хоёр ч удаа энэ аймгаас сонгогдож, найман жил парламентад суусан ч тойрогтоо муу ажилласан гэсэн дүн авчээ. АН-аас сонгогдсон Н.Алтангэрэл харин тойрогтоо зарцуулах тэрбум төгрөгийг хүүгийнхээ компаниар дамжуулан угаасан гэх хэл аманд өртөөд байгаа юм.

  Нар тоссон нутаг, зүүн хязгаарт Ц.Шинэбаяр ба “шинэ” хүмүүсийн нэрс ийнхүү тодорч эхэллээ. Дорнодынхны дэмжлэг хүлээн сонгогдох магадалтай, рейтинг өндөртэй байгаа нь ИЗНН-аас нэр дэвшиж буй “Дорнод нутаг клуб”-ыг үүсгэн байгуулагч С.Отгонбаатар, МАН-ын нэр дэвшигч, дэд сайд Б.Ундармаа нар гэдгийг цөөнгүй эх сурвалж болон зарим судалгааны дүн харуулжээ. Намуудын эрх бүхий хурлуудаар нэр дэвшигчид эцэслэн шийдэгдээгүй байгаа ч өнөө маргаашгүй албан ёсоор эрхээ авах магадлал өндөртэй хүмүүсийн нэрс тодорсоор байна.