УИХ-ын гишүүн Э.Бат-Үүлийг өчигдөр Нийслэлийн АН-ын даргаар сонгосон билээ. Тэрбээр энэ тухайд хэвлэлийн бага хурал зарлаж 2012 оны нийслэлийн сонгуульд АН ялна гэдэгт найдаж байгаагаа хэлсэн юм. Тэрбээр "илэн далангүй хэлэхэд бид сонгуульд амжилт олно" гээд өмнө нь нийслэлийн засаг даргын орон тоонд дандаа МАН-ын хүмүүс ордог байсныг энэ удаа өөрчлөх бодолтой байгаагаа илэрхийллээ. Э.Бат-Үүл гишүүн "Улаанбаатарчууд өнөөгийн нийслэлийг удирдаж байгаа хүмүүст сэтгэл ханамжгүй байгаа. Тиймээс ч том хэмжээний өөрчлөлтийг хүсч байгаа нь судалгаанаас харагдаж байна. Үнэндээ МАН 92 жилийн турш нийслэлийг удирдсан. Ж.Наранцацралт агсны удирдаж байсан богино хугацааг эс оролцуулбал шүү дээ.  Ямар ч байсан нийслэлийн хэмжээнд том хэмжээний хувьсгалт өөрчлөлт хийх санаа мөрийн хөтөлбөрт тусгагдсан" гэв.
 АН-ын лидер гишүүдийн нэг Э.Бат-Үүл УИХ-ын танхимд биш хотын захирагчийн албан тушаалд өрсөлдөх нь аль эртнээс яригдаж байсан зүйл юм.