Монгол Улсын гурав дахь Ерөнхийлөгч, МАХН-ын дарга Н.Энхбаяр салаавч гаргав. Супер үзүүлбэр байгаа биз. Юун Лэди Гага. Тэр эхлээд “Гутлаа өмсөхгүй” гэж гөжүүдэлсэн. Тиймээс тусгайгийнхан гуталгүй Ерөнхийлөгчийг Төв аймаг дахь цагдан хорих төвд өргөж аваачаад хорьчихсон. Харин дараа нь Н.Энхбаяр “Намайг яллагдагчаар татах тухай тогтоолыг яасан ч сонсохгүй” хэмээн чихээ таглаж, нүдээ бүлтийлгэн гүрийсэн. Тэр ч атугай тогтоол танилцуулсан АТГ-ын ажилтантай өрсөн ярьж, өөрийгөө өмөөрсөн. Шоронд биш, торонд орсон Н.Энхбаяр ийн аяглаж, тойрон бүжиглэгчид нь Төрийн ордон тийш хараалын үгс урсгацгаана. Монголын цирк алиалагчдаар дутсан энэ цагт Монгол төрийн ¹1 явсан эрхэм ийнхүү алиалагчийн дүрд тоглох болов. Яг л “Харахгүй, сонсохгүй, хэлэхгүй”-г бэлгэдсэн гурван сармагчин шиг.

   Малайз, филиппинчүүд Лэди Гагагийн өөдөөс “салаавч” гаргав. Аялан тоглолт хийхийг нь ч хориглов. Бүр “Манай улсад хөл тавьбал амь насанд чинь халдана шүү” гэж заналхийлэв. Харин экс Ерөнхийлөгч төрд террор зан гаргах боллоо. Албан үүргээ гүйцэтгэж яваа хууль сахиулагчдын өөдөөс “Би Монгол Улсын Ерөнхийлөгч за юу. Чи муу п… юу юм бэ. Намайг яллаж амжихгүй шүү, та нар” хэмээн эмнэлгийн орон дээр хэвтчихээд салаавч гаргаж байна. Төрийг бас тавлаж байна.

   Ш.Сайхансамбуугийн салаавч үзүүлэх ШБОС Н.Энхбаярт ингэж халдварлав. “МАХН гэдэг нам байгуулна” гээд Ардын намаас хөтлөлцөн гарсан Ц.Шинэбаяр гишүүний салаавч гаргадаг технологийг экс Ерөнхийлөгч ийн “хуулбарлав”. Үгүй ээ, биш юм байна. Энэ бол Н.Энхбаярын технологи. Экс Ерөнхийлөгч МАХН буюу Монголын авлигачдыг хамгаалах намыг захирч байхдаа бодож олсон ШБОС нь. Ард түмэн авлигачдад дургүй. Авлигачид ард түмэнд бүр ч дургүй. Тэр тусмаа МАХН буюу Монголын авлигачдыг хамгаалах намынхан төр, цагдаа хоёрыг үзэн яддаг. Тиймээс тэд төрийн хуулийг сахиулагчдын өөдөөс салаавч гаргасан нь тэр. Экс Ерөнхийлөгч энгийн нэгэн үүрэг гүйцэтгэгчид рүү салаавч үзүүлсэн нь энэ араншингаа ил гаргасан царай нь. Ерөөс Монгол төрийн үнэлэмж салаавчин дээр тогтдог аж. Ийм жишгийг тогтоосон автор нь экс Ерөнхийлөгч Н.Энхбаяр юм.

   Лэди Гагагийн дуулсан дуу болгон хит болдог бол Н.Энхбаярын тогтоосон дүрэм бүхэн төрийн хуулиас ч хүчтэй байсан үе бий. Тэрбээр Төрийн тэргүүний сэнтийгээс авлигачид, бас тэднийг хамгаалах бүхэл бүтэн системийг бий болгосон. Тэрхүү систем нь өөр, өөр ашиг сонирхлын бүлэглэлүүд болон хуваагдсан болохоос биш одоо ч устаагүй. Тиймээс экс Ерөнхийлөгч өлсгөлөн зарлаж, өвчтөний орон дээр хэвтчихээд системээ сэргээхийг хүсэж байна. Ардын намаас гарч, МАХН-ыг байгуулсан нь ч тийм учиртай аж. Тийм ээ, одоогийн МАХН бол Н.Энхбаярыг авлигын системтэй нь торгоож үлдэх “зүү” нь. “ Аль Кайда” бүлэглэлийн тэргүүн Осама Бин Ладен дэлхийн ¹1 алан хядагч мөн байсан уу, тийм. Ливийн удирдагч, хурандаа Муаммар Каддафи дарангуйлагч байв уу, бас л тийм. Египетийн Ерөнхийлөгч асан, өдгөө 84 настай Хосни Мубарак тус улсыг 30 жил дарангуйлсан этгээд мөн үү, мөн л тийм. Харин тэдний хувь тавилан хэрхэв. Осама Бин Ладеныг америкчууд үгүй хийсэн. Муаммар Каддафи Ливийн босогчдын гарт амиа алдсан. Харин Хосни Мубарак шүүх танхимд насылкатай хүргэгдэн ирж “Би ямар ч буруугүй” хэмээн өчсөн. Тэглээ гээд египетчүүд түүнийг өрөвдөж, нулимс унагасан уу. Үгүй. Харин ч түүнийг үзэн яддаг хэвээр байсан.

   Энгийн ардууд шүүхийн гадна жагсаж “Түүнийг хурдан цаазал” хэмээн шаардаж байв. Гэлээ гээд Хосни Мубарак шүүгчид рүү, бас ард түмнийхээ өөдөөс салаавч гаргаж зүрхлээгүй л юм. Хосни Мубарак байтугай Осама Бин Ладен ч америкчуудын өөдөөс салаавч үзүүлсэн нь үгүй. Муаммар Каддафи ч мөн адил. Харин тэгж чадсан эрхэм бол Монголын улс төрийн Мистер Гага-Н.Энхбаяр юм. Монгол төрийн их хаалгаар үзэгнээс өөр өмчгүй анх орж ирсэн тэрбээр төрд салаавч “бэлэглэх” нь энэ. Тийм ээ, эрх баригч хүчний тэргүүн, Ерөнхий сайд, УИХ-ын дарга, Төрийн тэргүүний алба хашиж байсан Н.Энхбаярт хуулиас дээгүүр эрх мэдэл байна. Тэр бол салаавч. Итгэсэн, өрөвдсөн, уйлсан, өмгөөлөн хамгаалсан ард олонд өгсөн хариу нь ч бас салаавч…