МАН-ын нөлөө бүхий эрхэм С.Баяр эрүүл мэндийн байдлаасаа үүдэн сэм сэмхэн хилийн дээс алхдаг болоод удаж байна. Тэрээр одоо ч эх орноосоо яваад удаж байгаа гэж эх сурвалж мэдээллээ. Түүнийг байхгүй хойгуур олон үйл явдал өрнөж байна.

   Юун түрүүнд хамгийн дотны хүн болох АМГ-ын дарга Д.Батхуягийг нь “аавынд” хийчихсэн. Энэ эрхэмийг С.Баяр томоохон албан тушаалд томилж, өмгөөлж хамгаалан их улс төрийнх нь эхлэлийг тавьсан. Үүний зэрэгцээ С.Баярын багын найз Цөмийн энергийн газрын дарга асан С.Энхбатыг бас л АТГ-ынхан шалгаж эхэлсэн мэдээлэл хэвлэлийн хуудаснаа үзэгдэх боллоо. Үүнтэй зэрэгцээд С.Баярыг УИХ-д нэр дэвшвэл өлсөглөн зарлана гэж зарим хөдөлгөөнийхөн айлгах болов. Энэ бүхэн тохиолдлынх биш нь ойлгомжтой. Ажиглагчдын хэлж байгаагаар бол С.Баярт сануулга өгч эхэлсний дохио гэнэ. Яагаад С.Баярт сануулга өгөх болов оо? Түүнийг 7-р сарын нэгэн, Оюу толгойн гэрээтэй холбон буруутгадаг. Гэвч эдгээр буруутгал С.Баярын өндөр нэр хүндийг бууруулах үндэслэл болж чаддаггүй. 

    Харин ч С.Баярыг залгамжлагчид түүнийг хүндэтгэн хамгаалсаар байна. Түүний нэг илрэл нь С.Баярыг эзгүй хойгуур нь намыхаа 28-ын листийн 5-рт нэрийг нь зоожээ. С.Баяр тавын тоонд дуртай болохоор ингэж шийдсэн ч байж мэднэ. Эсвэл ингэж эрэмбэлэгдэх нь тохиол ч байж болно. Юутай ч гэсэн С.Баяр намынхаа жагсаалтын тавд байгаа аж. Тэрээр маргааш болох МАН-ынхаа бага хуралд оролцохгүй гэдгээ намынхандаа мэдэгджээ. Харин эмчилгээгээ үргэлжлүүлэхээр болжээ. Биеэ сайн эмчилж аваад сонгуулийн гал ид дүрэлзэж байх үед АНУ-аас дуулиан шуугиантай ирэх бололтой. С.Баяр ирсэн тухай домог хэвлэлийн хуудсыг чимнэ. Мэдээж тэр намынхаа нэр хүндийг өсгөх ажиллагааг явуулна. Хүнд байгаа тойргуудад ажиллаж нэр дэвшигчдийг дэмжинэ гэсэн тактик барих бололтой.

   Ийнхүү олны анхаарлын төвд байдаг С.Баяр 2012 оны сонгуульд нэр дэвшигчдээ тодруулах МАН-ынхаа бага хурал оролцохгүй.
Нэгэн цагт Монголын хамгийн том намыг удирдаж, нөхөрлөж бас зөрчилдөж явсан хоёр эрхэмийн хувьд маргааш онцгой өдөр болох гэж байна. Маргааш болох МАН-ын бага хурлын үеэр гадаадад эмчлүүлж байгаа С.Баярыг УИХ-д нэр дэвшүүлнэ. Харин энэ үйл явдалтай давхцан МАХН-ын дарга, ерөнхийлөгч асан Н.Энхбаярыг шүүх ажиллагаа явна. Магадгүй нэг нь УИХ-д нэр дэвшиж, нөгөөх нь “аавынд” суух ял авч мэднэ. Ийнхүү хувь заяаны гунигтай тохиол Монголын лидерүүдийн өөр өөр хувь тавиланг нэг өдөр шийдэх нь.