Нийслэлийн Сүхбаатар дүүргийн IV хорооны нутагт байрлах Хаан банкны арын орон сууцанд амьдардаг байсан 75 настай эмэгтэйн хоолойг хэрчиж, амийг нь егүүтгэсэн онц ноцтой хэрэг гарсан талаар бид мэдээлсэн билээ.

Хүн амины онц ноцтой хэргийг Сүхбаатар дүүргийн Цагдаагийн нэгдүгээр хэлтэст шалгаж байгаа бөгөөд хэрэгтнийг илрүүлэн, саатуулаад байгаа юм. Одоогоор эл аймшигт хэрэг үйлдэгдсэн газрыг хамгаалалтад авч, мөрдөн байцаалтын ажиллагаа явуулж байна.

Хэргийн талаар тодруулбал, 75 настай эмэгтэйн хоолойг хэрчиж, амийг нь егүүтгэсэн эл хэрэг энэ сарын 17-нд гарсан байх магадлалтай аж.

Учир нь хөршүүдийнх нь яриагаар талийгаач энэ сарын 16-нд эсэн мэнд явж байсан ч, 17-ны өдрөөс хойш огт харагдаагүй, нохой нь гэртээ байнга хуцаад байсан тул 18-ны өдөр цагдаад хандсан гэсэн байна. Талийгаач эмэгтэйн үр хүүхдүүд нь гадаадад амьдардаг бөгөөд тэрээр нохойтойгоо л амьдардаг байжээ.

Хэрэгтний талаар албаны хүнээс тодруулахад “Улсын мөрдөн байцаах газрын онц хүнд гэмт хэрэгтэй тэмцэх хэлтэс, Эрүүгийн цагдаагийн газар сэжигтэнг эрэн сурвалжилж, өчигдөр 17:00 цагийн орчимд баривчилсан. Сэжигтэн одоогоор хэргээ хүлээгээд байгаа” гэв.

Д.Ундрах /24tsag.mn/