Ардчилсан Намыг тойрсон хэрүүл үргэлжилж талцал хуваагдлаар дүүрэн байна. Хэдхэн хоногийн өмнө намын их хурлаа хийж “Нээлттэй-Цэгцтэй” уриан дор эвдэлдэж байсан Ардчилсан нам гэдсэндээ хөлөө жийлцэж эхэлсэн.
Ардчилсан нам бол фракцын нам. Эхийг нь эцээж, тугалыг нь тураахгүй авч явах үүрэг АН-ын дарга, УИХ дахь АН-ын Бүлгийн дарга О.Цогтгэрэлд оногдсон ч дутуу угжсан бололтой. Намын даргаар батламжлагдсан даруйдаа намын дүрэм хөтөлбөрийн ажлын хэсгийг ахалж, Улсын дээд шүүхэд амжилттай батлуулж чадсан ЕНБД Н.Ганибалыг өчиггүй батирч өөрийн зөвлөх Д.Амарбаясгалангаар орлуулаад амжсан.
Гэвч ҮБХ-ны хорооны анхдугаар хуралдаанаар ЕНБД-д хоёр хүнийг танилцуулж, нэр дэвшүүлээд ҮБХ-ноосоо дэмжлэг авсангүй. ЕНБД-ын албан үүргийг түр орлон гүйцэтгэгч Д.Амарбаясгаланг дэвшүүлээд унав. Нөгөөх нь “ойчсон бөхөд шалтаг мундахгүй” гэгчээр “Тооллогын комисс”-т асуудал үүссэн. Хурал даргалагч, ХЕХ-доо өргөдөл өгнө хэмээн зогсож байв. Үүний дараа дахин өөрийн зөвлөх А.Батпүрэвийг дэвшүүлээд ч амжилт олсонгүй. Бантсандаа юу, ичсэндээ юу ЕНБД-ыг нэг сарын дотор ҮБХ дахин хуралдаж сонгохоор болоод тараасан.
О.Цогтгэрэл компани удирдаж сурсан ч улс төрийн намаа удирдаж чадаагүй. Бүр намаа компани болгоод амжжээ. Тодруулбал, хэдхэн хоногийн өмнөх ҮБХ-ны гишүүний сонгуульд өөрийн хамаарал бүхий зөвлөх, туслах бүгдийг нь ҮБХ-ны гишүүн болгожээ.
| М.Чимэддорж |
Хан-Уул дүүргээс ҮБХ-ний гишүүн |
УИХ дахь АН-ын Бүлгийн “Ахлах зөвлөх” |
| Д.Батмөнх |
Сонгинохайрхан дүүргээс ҮБХ-ний гишүүн |
УИХ дахь АН-ын Бүлгийн ажлын алба |
| А.Батпүрэв |
Хан-Уул дүүргээс ҮБХ-ний гишүүн |
УИХ дахь АН-ын Бүлгийн "Эдийн засгийн бодлогын зөвлөх" |
| Ж.Эрдэнэтогтох |
Увс аймгаас ҮБХ-ний гишүүн |
О.Цогтгэрэл гишүүний зөвлөх |
| Э.Намуун |
Налайх дүүргээс ҮБХ гишүүн |
О.Цогтгэрэл гишүүний туслах |
Бусдын боломжийг энэ мэтээр булаан авч, ардчиллын төлөө амьдрал, хүч хөдөлмөрөө зориулсан олон гишүүд, дэмжигчдийн итгэл үнэмшил, зүтгэлийг илт үгүйсгэж байгаа нь намын дотоод ардчилал үндсэндээ доройтож, шударга өрсөлдөөний зарчим алдагдаж буйг харуулав.
Мөн тэрээр намын УТЗ-ийн гишүүдийг сонгохдоо нээлттэй дүрээр боловч ҮБХ-ны арван гишүүнийг багцлан бүлэглэж, тэдний дундаас нэг Улс төрийн зөвлөлийн гишүүнийг сонгох зарчмаар шийдвэрлэсэн гэх яриа ҮБХ-ны хурлаар ил далд яригдсан гэнэ.
Ямартай ч АН-ын дотоод сонгууль будлиантай, будаан дээрээ зодоонтойгоор талцал зөрчил дагууллаа. Арай гэж эвлэж нийлсэн намаа өөрийн атганд зангидах, шийдвэр гаргах эрх мэдлийг хязгаарлах, дотоод өрсөлдөөнийг боомилох хандлага ажиглагдав. Ардчилсан нам НЭЭЛТТЭЙ-ЦЭГЦТЭЙ байх үндсэн зарчмаасаа ухарч, ХААЛТТАЙ-ТӨВЛӨРСӨН ШИЙДВЭР ГАРГАЛТ бүхий тогтолцоо руу шилжиж байгаа нь дотоод АРДЧИЛЛЫН ноцтой ДОРОЙТОЛ болов.
Т.Зузу
Сэтгэгдэл (2)