Хосын харилцаагаа ухамсартайгаар удирдах, ойлголцол ба итгэлцлийг бэхжүүлэх, зөрчилдөөнийг эрүүл аргаар шийдвэрлэхэд чиглэсэн “Хосын харилцааны менежмент” сургалт зохион байгуулагдлаа.
Тус сургалтаар хосын эрүүл харилцааг бий болгох суурь зарчим, үр дүнтэй харилцааны ур чадвар, харилцан хүндлэл, итгэлцлийг бэхжүүлэх арга зам, үл ойлголцол болон зөрчилдөөнийг зөв зохистой шийдвэрлэх арга барилын талаар хосуудад мэдээлэл өгөв.
Сэтгэл зүйч, MBA М.Мөнхгэрэл “Хоёр өөр орчинд арав, хорин жил өсөж, төлөвшсөн хүмүүс гэр бүл болно гэдэг амар зүйл биш. Би + Чи = Бид болдог. Тиймээс “Бид”-ээ зөв бүтээхийн тулд эхлээд өөрийгөө сайтар таньж мэдэх нь чухал” хэмээн өөрийгөө ойлгох нь эрүүл, тогтвортой харилцааны үндэс болохыг онцоллоо.
Мөн гэр бүлийн харилцаанд тулгардаг нийтлэг сорилтуудыг даван туулах, сэтгэл хөдлөлөө зөв илэрхийлэх, хамтдаа шийдвэр гаргах, бие биенээ ойлгож дэмжих дадал хэвшлийг хөгжүүлэхэд чиглэсэн практик дасгал, хэлэлцүүлэг өрнүүлсэн юм.
Сургалтын үеэр оролцогчид хосын харилцаанд тулгамддаг асуудлуудыг нээлттэй ярилцаж, туршлага солилцон, харилцаагаа илүү эрүүл, тогтвортой, аз жаргалтай байлгах арга замын талаар ойлголтоо нэмэгдүүллээ.
