Өчигдөр Тайландын цагдаагийн албанаас сэжигтний талаар мэдээлэл өгч, түүнийг баривчилахад туслалцаа үзүүлсэн хүнд нэг сая бат буюу 28000 ам.долларын мөнгөн шагнал өгөхөө мэдэгдээд байсан.

Тэгвэл тус улсын нэгэн нэрээ нууцалсан бизнесмен цагдаагийн газартай холбогдон, дахин нэг сая батыг хувиасаа нэмж өгөхөөр болсон байна. Ингээд сэжигтнийг барихад туслах үнэтэй мэдээлэл өгсөн хүнд 2 сая бат буюу ойролцоогоор 56000 ам.долларын мөнгөн шагнал өгөхөөр болоод байна. Мөн сэжигтний үйлчлүүлсэн гурван дугуйт таксины жолоочийг олж, түүнээс сэжигтний талаар мэдүүлэг авч байгаа бөгөөд түүний мэдүүлгийн талаар өнөөдөр мэдээлэл өгөх болно гэсэн байна.

Тайландын цагдаагийн газрын зүгээс өчигдөр мөн мэдэгдэл хийсэн байна. Энэхүү мэдэгдэлд тэдний өөр нэг сэжүүр болох дэлбэрэлт болсон газарт явж байсан хоёр этгээдийн нэг нь цүнхээ сандал дээр тавьж байгаа бичлэгийн эзнийг хайж байсан талаар мэдэгдсэн байна. Бичлэгэн дээррх хоёр этгээдийн нэг нь өөрөө цагдаагийн газарт хүрэлцэн ирж мэдүүлэг өгчээ. Мэдүүлэг өгсөн этгээд тус улсын аялалын хөтчөөр ажилладаг иргэн байсан ба цүнхээ сандал дээр тавьсан этгээд тус улсад аялал жуулчлалын зорилгоор ирсэн БНХАУ-ын иргэн байсан байна. Тэрээр нутаг буцсан ба эдгээр хоёр этгээдийг хэрэгт ямар ч холбоогүй болохыг Тайландын цагдаагийн албанаас хийсэн мэдэгдэлд дурьдсан байна. Тайландын цагдаагийн албанаас мөн нэмж 10000 албан хаагчийг хотын иргэд болон жуулчдын аюулгүй байдлыг хангах үүднээс гудмуудад ажиллуулж байна.

4 хоногийн өмнө Бангкок хотноо болсон дэлбэрэлтийн улмаас 20 хүн амь үрэгдэж, 63 хүн эмнэлэгт хүргэгдсэнээс 18 хүний биеийн байдал тун хүнд байгаа юм.