Өчигдөр ХУД-ийн нутаг Биокомбинатын зам, ЗХ-ний 120 дугаар ангийн урд замд Х.Сонота маркийн авто машин  онхолдож жолооч 26 настай эрэгтэй Д нас барсан харамсалтай хэрэг гарчээ.

Мөн СХД-ийн нутаг 52-ын давааны урд замд Энхбулаг амралтын газрын зүүн замд "Mitsubishi L-200" маркийн авто машины жолооч Ц нь ЗХ-ний 084 дүгээр ангийн "Зил131" маркийн авто машинтай мөргөлдөж  24 настай эрэгтэй М, 26 настай эрэгтэй А нарын 2 хүн нас барж 21 хүн гэмтсэн маш ноцтой осол гарчээ.

Эх сурвалжийн хэлж буйгаар талийгаачид ЗХ-ний 084 дүгээр ангйн ахлагч нар бөгөөд гэмтсэн 21 хүн  ч тус ангийн ахлагчид бөгөөд одоогоор  Цэргийн госпиталд эмчлүүлж байгаа аж.

Мөн өөр нэгэн эх сурвалжийн хэлж буйгаар Батлан Хамгаалах яамны “Шүхэрт десант” тусгай ангийн 21 алба хаагчийг тээвэрлэж явсан ачааны хоёр автомашин урсгал сөрж Сэлэнгэ аймгийн дугаартай автомашинтай мөргөлдсөний улмаас эл осол гарчээ.  Цэргийн төв Госпитальд хэвтэн эмчлүүлж буй цэргүүдээс 10 гаруй цэргийн бие хүндэвтэр бэртэлтэй бөгөөд яс, дотор эрхтэн, нурууны зөөлөн эдийн хүнд төрлийн гэмтэлтэй байгаа аж.

Хичээлийн шинэ жил болох гэж байгаатайгаар хөдөө орон нугаас Улаанбаатар хотыг чиглэсэн хөдөлгөөн эрс нэмэгдэж байна.  Хөдөө орон нутгийн замд жолооч нар нь хурд хэтрүүлэх, гүйцэт түрүүлэх үйлдлийг хийхдээ аюулгүй байдлаа зөв тооцоолдоггүй, тээврийн хэрэгслийн техникийн тодорхойлтоос зааж өгсөн ачаа болон чиргүүлийн даац хэтрүүлэх,  жолоочийн ур чадвар хангалтгүй, бүрэн бус тээврийн хэрэгсэлтэй оролцох зам тээврийн осолд өртөх шалтгаан нөхцлийг бүрдүүлж байна. Иймд хөдөө орон нутгийн замд анхаарал болгоомжтой аюулгүй байдлаа сайтар хангаж оролцохыг зөвлөж байна.

Д.Ундрах /24tsag.mn/