Энэ баасан гарагт буюу энэ сарын 21-нд СХД-ийн нутаг 52-ын давааны урд замд Энхбулаг амралтын газрын зүүн замд "Mitsubishi L-200" маркийн авто машины жолооч Ц нь Зэвсэгт хүчний 084 дүгээр ангийн "Зил131" маркийн авто машинтай мөргөлдөж  24 настай эрэгтэй М, 26 настай эрэгтэй А нарын 2 хүн нас барж, 21 хүн гэмтсэн маш ноцтой осол гарсан талаар бид мэдээлсэн.

 
Эх сурвалжийн хэлж буйгаар талийгаачид ЗХ-ний 084 дүгээр ангйн ахлагч нар бөгөөд гэмтсэн 21 хүн  ч тус ангийн ахлагчид аж. Гэмтсэн хүмүүсийн хувьд одоогоор  Цэргийн госпиталд эмчлүүлж байгаа аж. Цэргийн төв Госпитальд хэвтэн эмчлүүлж буй цэргүүдээс 10 гаруй цэргийн бие хүндэвтэр бэртэлтэй бөгөөд яс, дотор эрхтэн, нурууны зөөлөн эдийн хүнд төрлийн гэмтэлтэй байгаа аж.

Харин талийгаачдын хувьд 26 настай А нь ОХУ-д цэргийн эмчийн мэргэжлээр төгсөж ирээд 084 дүгээр ангид ажилд орсон байжээ. Тэгвэл 24 настай М нь өнгөрсөн хавар Ахлагчийн сургууль төгссөн байна.

Зарим эх сурвалжийн мэдээлж буйгаар Батлан Хамгаалах яамны “Шүхэрт десант” тусгай ангийн 21 алба хаагчийг тээвэрлэж явсан ачааны хоёр автомашин урсгал сөрж Сэлэнгэ аймгийн дугаартай автомашинтай мөргөлдсөний улмаас эл осол гарсан гэж байна.

Цэргүүдийн машинтай мөргөлдсөн "Mitsubishi L-200" маркийн машины жолоочийн биеийн байдал гайгүй байгаа аж. Түүнийг хэрэгт холбогдуулан шалгах ажиллагаа үргэлжилж байна. Эх сурвалжийн хэлж буйгаар түүнд эрүүгийн хэрэг үүсгэн шалгалтын ажиллагааг хийж байгаа аж.

Хөдөө орон нугаас Улаанбаатар хотыг чиглэсэн хөдөлгөөн эрс нэмэгдэж байгаа энэ үед осол аваар эрс нэмэгддэг.  Учир нь хөдөө орон нутгийн замд жолооч нар нь хурд хэтрүүлэх, гүйцэт түрүүлэх үйлдлийг хийхдээ аюулгүй байдлаа зөв тооцоолдоггүй, тээврийн хэрэгслийн техникийн тодорхойлтоос зааж өгсөн ачаа болон чиргүүлийн даац хэтрүүлэх,  жолоочийн ур чадвар хангалтгүй, бүрэн бус тээврийн хэрэгсэлтэй оролцох зам тээврийн осолд өртөх шалтгаан нөхцлийг бүрдүүлж байна. Иймд хөдөө орон нутгийн замд анхаарал болгоомжтой аюулгүй байдлаа сайтар хангаж оролцохыг зөвлөж байна.

Д.Дуулим