“Төрийн мэдээлэл” эмхэтгэлийн  31 дэх дугаарт УИХ-ын ээлжит бус чуулганаар баталсан Өршөөлийн тухай хууль болон уг хууль Ерөнхийлөгчийн тавьсан хоригийг нийтэлсэн.

Ингэснээр Өршөөлийн хууль хүчин төгөлдөр болж эхэлсэн гэж иргэдийн хувьд үзэж байгаа.  “Төрийн мэдээлэл” сэтгүүл 7 хоног тутам гардаг.  Үүнийг эцсийн хэлэлцүүлэг буюу Ерөнхийлөгчийн хоригийн хугацаа дууссаны дараа албан ёсоор нийтэлсэн гэж албаныхан хэлээд байгаа.

Тэгвэл удахгүй болох шүүх хурлуудад Өршөөлийн хуулийг дагах уу, эсвэл зүйл ангиар нь шийдвэрлэх үү гээд ихэд эргэлзээтэй асуудлууд гарч ирж байна.

Тухайлбал, Ерөнхий сайд асан Н.Алтанхуягийн ахлах зөвлөн байсан Л.Гансүхийн шүүх хурал аравх хүрэхгүй хоногийн дараа  болно. Тэгвэл түүний хэрэг Өршөөлийн хуульд хамрагдаж байгаа ч шүүх хурлаар хэрхэн шийдвэрлэх нь эргэлзээтэй байна. Өөрөөр хэлбэл, түүнийг Эрүүгийн хуулийн тусгай ангийн 150.3, 263.2-т зааснаар буруутгаж байгаа. Тэгвэл шүүх хурлаар эдгээр зүйл заалт Өршөөлийн хуульд хамрагдсан гэж үзэх үү, эсвэл энэ зүйл заалтаар нь буруутгаад явах уу гэдэг ойлгомжгүй байгаа юм.

Энэ нь Өршөөлийн хууль хэзээнээс эхэлж хүчин төгөлдөр үйлчилж эхлэх хийгээд үйлчлээд эхэлчихсэн үү зэрэг асуудалд иргэдийг төөрөлдөхөд хүргээд байна.

Д.Дуулим