Өнгөрсөн 7 хоногт Хоёр Солонгосын хил дээр харилцан гал нээснээс хойш нөхцөл байдал эгзэгтэй болоод байна. Хойд ба Өмнөд Солонгосын төлөөлөгчид гэрээ хэлэлцээр хийхээр 3 дахь хоногтоо ороод байгаа юм. Уулзалт хэлэлцээр үргэлжилж байгаа ч одоогоор ямар нэг шийдэлд хүрээгүй, хоёр улсын хилийн ойролцоо байлдааны бэлэн байдалтай хэвээр байна.

Өнөөдөр Өмнөд Солонгос улсын Ерөнхийлөгч хатагтай Пак Ген Хэ мэдэгдэл хийж Хойд Солонгос улсын Засгийн газрыг хүлцэл өчихийг шаардсан байна. Энэ сарын эхэнд Хойд Солонгос газрын мина тавьж Өмнөдийн хоёр цэрэг шархадсан юм. Хойд Солонгос улс энэ үйлдлийнхээ хариуд хүлцэл өчихгүй бол Өмнөдийн телевизээр Хойд Солонгосын эсрэг ухуулга сурталчилгаа явуулсаар байна гэдгээ хатагтай Пак Ген Хэ анхааруулжээ.Тэрээр “Жил бүхэн давтагддаг өдөөн хатгах шинж чанартай энэ үйлдлийг дахин гаргахгүйн тулд урьдчилан сэргийлж, уучлалт гуйх хэрэгтэй. Урьдчилан сэргийлэх арга хэмжээ авч, уучлалт гуйж чадахгүй бол Өмнөд Солонгос улс шууд арга хэмжээ авч ухуулга сурталчилгаагаа үргэлжлүүлсээр байх болно. Би цэрэг арми даа итгэл хүлээлгэж байна. Хойд Солонгосчуудын явуулж буй өдөөн хатгалгын хариуг хатуухан барих болно. Гэхдээ хоёр улс хэлэлцээрт хүрвэл хамтдаа хөгжиж цэцэглэж Солонгосын хойгт энхийг сахиулахын тулд чадах бүхнээ хийнэ”гэлээ.Харин Пхеньяны зүгээс Өмнөдийнхний явуулж буй ухуулга сурталчилгааг болиулахыг шаардаж байгаа юм. Хойд Солонгосын хил дээр армийн цэргүүд, усан онгоцууд бэлэн байгааг Сөүлээс анхаарууллаа. 3 хоногийн турш явагдаж байгаа хэлэлцээр Хоёр Солонгосын өндөр дээд хэмжээний эрх баригчдын жилийн дараа хийж буй уулзалт юм.