Нийслэл даяар дөрөвдүгээр сарын 1-нээс тавдугаар сарын 30-ны хооронд дүүргийн гэр болон орон сууцны хороолол, байгууллага, аж ахуйн нэгж, нийтийн эзэмшлийн гудамж талбайн хог хаягдлыг цуглуулах, тээвэрлэх үйл ажиллагааг эрчимжүүлэх, ард иргэдийн цэвэр эрүүл орчинд амьдрах нөхцөлийг бүрдүүлэхээр “Хоггүй Улаанбаатар” аян өрнүүлсэн билээ.Аяны хүрээнд Хан-Уул дүүргийнхэн Засаг даргын орлогчоороо ахлуулан 4,5 дугаар сарын бямба, ням гариг бүр их цэвэрлэгээ хийж, нийтийн эзэмшлийн зам талбай, гэр хорооллын айл өрх болон ил задгай үүссэн хог хаягдлыг цэвэрлэх ажлыг зохион байгуулснаар 784 рейс буюу 7736 метр куб хог ачиж тээвэрлэжээ.
Эдгээр их цэвэрлэгээний үеэр гэр хорооллын айл өрхөөс нийт 498 рейсээр 3984 метр куб ахуйн хог хаягдлыг бүрэн ачиж тээвэрлүүлсэн бөгөөд нийт 122 рейс буюу 2440 метр куб хог хаягдлыг цэвэрлэж тээвэрлэх ажлыг тус тус хийж гүйцэтгэсэн байна.
Уг аяны хүрээнд ТҮК-ийн ажилчид Чингисийн өргөн чөлөөний дагуух замын 1038400 метр квадрат талбайд түүвэр хийж, 55440 метр квадрат замын нуухны шороог шүүрджээ. Мөн зам талбайн бригад Их тэнгэр, Зайсан, Махатма Ганди, Олимпийн гудамжинд өдөр тутам гарч нийт 349800 метр квадрат талбайд түүвэр цэвэрлэгээ хийсэн аж.
Түүнчлэн ТҮК-ийн ногоон байгууламжийн ажилчид Чингисийн өргөн чөлөөний замын дагуух 12600 метр квадрат хөрс боловсруултыг хийж зүлэгжүүлэхийн зэрэгцээ Чингисийн өргөн чөлөөний тоосгон хашлаганы нарийн зурвас болон ногоон байгууламжийн хэсэгт өдөр тутам усалгаа хийж байгаа юм байна.
