Наранд ягаарсан хацар, бүлээхэн салхи, богинохон дэрвэгэр хормой, энгэр нь задгай цамц...мэдэхгүй юм даа, зуны улирлын бүх юм нэг л романтик байдаг юм. Өдөр уртсаж, шөнө дулаарсан энэ үед хайрттайгаа яаж болзохоо мэдэхгүй байвал: Цэцэрлэгт хүрээлэн дэх пикник
Нарны тос, шумуулны тос хоёроо түрхээд нэг өдөр голын эрэг дээр, эсвэл цэцэрлэгт хүрээлэнд пикник хийхийг түүндээ санал болго. Нимгэн хөнжил, хөнгөн зууш, аяны халбага сэрээ байхад л болно. Хүсвэл дэрээ ч аваад явсан болно шүү. Хэрэв хоол хийж амжихааргүй бол, дуртай ресторан луугаа орж хоол савлуулж аваад л гүйцээ. Жимс, бяслаг, жигнэмэг, сэндвич, жижиг дессертүүд, дээр нь нэмээд нэг жижиг шилтэй дарс байвал бүр сонирхолтой. Шавьж багатай, сүүдэртэй дулаахан цэг олж аваад, хэвтээд өг. Тэгээд бие биенийхээ ам руу гүзээлзгэнэ хийж тогло. Диваажин л гэсэн үг.
Барбекю
Юм идэнгээ, цэвэр агаар гарах өөр нэг арга бол барбекю хийх. Хүсвэл хостой найзуудаасаа урьж хамтдаа болзож болох юм. Эрчүүд мах гриллдэх тун дуртай байдаг. Хэрвээ грилл байхгүй бол, агаар гараад түүдэг гал асааж мах шарж өгөхийг ч хүсч болно. Түүнд энэ болзооны хамгийн чухал хэсгүүдийг даатгаарай. Харин чи махтайгаа цуг идэх өргөст хэмх, ногооны зуушийг бэлдэхэд хангалттай. Жижигхэн хөгжим дээр цоглог ая тавьчихвал уур амьсгал бүр л сайжраад ирнэ.
Наран мандах, жаргах мөч
Аль нэг байшингийн дээвэр дээрээс юм уу, гүүрэн дээрээс ч хайрттайгаа нар мандахыг харж болно. Маш энгийн, атлаа өвөрмөц, дурсамжтай болзоо болох болно. Наран жаргах мөч ч гэсэн мандахаасаа дутахааргүй үзэсгэлэнтэй шүү дээ. Хэрвээ танай гэр өндөрт байдаг бол нар шингэх үед тагтан дээрээ зогсоод хундага оргилуун дарс тулгаж уугаарай. Хэрэв цаг гаргаж чадна гэвэл, хотын зах руу явж ч болно. Дээгүүрээ нөмрөх дулаан цамцаа аваарай. Учир нь наран жаргасны дараа, үргэлжлээд “мөнгөн сарны доорх болзоо” эхэлж магад.
Задгай тоглолтууд
Энэ зуны open air тоглолтуудын хуваарь эхнээсээ гараад эхэлчихсэн. Шүтдэг дуучнаа хараад, дуртай дуугаа чангаар орилоод, хайртай хүнтэйгээ болзоод...ийм олон догдлол нэгэн зэрэг байж болно гэж үү? Тасалбараа эртнээс авахыг зөвлөе, хүсвэл өөрөө түрүүлж 2 билет аваад хайртдаа сюрприз барьсан ч болно. Мэдээж та хоёр хэсэг хугацаанд хамт байгаад үзчихсэн бол шүү дээ.
Тоглоомын үдэш
Найзуудтайгаа, эсвэл хайрттайгаа хоёулахнаа зуны нэг оройг гэртээ видео тоглоом юм уу покердож өнгөрүүл. Энгийнээс эхэлмээр байвал, онгоц буудаж, үг таалцсан ч болно. Хувцас тайлах шийтгэлтэй тоглоомууд та хоёрыг улам ойртуулна.
Жуулчид болж тогло!
Өөрсдийгөө хотод шинээр ирсэн жуулчид мэтээр төсөөлөөд, хамтдаа УБ-г шинээр нээгээрэй. Хөшөө дурсгал, музей, хоытн сонирхолтой хэсгүүд дээр яг л гадаадаас ирсэн жуулчид шиг зургаа татуулж, бие биедээ тэдгээр газруудынхаа талаар тайлбарыг ярьж өг. Эрчүүд хэзээд том биетэй бяцхан жаалууд байдаг. Тиймээс тэдэнд ингэж тоглох нь лавтайяа таалагдана.
