МАХН-ын дарга Н.Энхбаярыг СЕХ-ноос бүртгэж авах асуудлыг түр хойшлуулаад байгаа. Учир нь Нийслэлийн прокурорын орлогч, улсын яллагч Е.Сагсай, Сүхбаатар дүүргийн шүүхийн ерөнхий шүүгч С.Соёмбо-Эрдэнэ нар СЕХ-нд Н.Энхбаярыг нэр дэвшүүлэхийг татгалзсан албан бичиг хүргүүлсэн юм. Гэвч тэдний эл үйлдлийг Н.Энхбаярын өмгөөлөгч О.Баасанхүү хууль бус үйлдэл хэмээн мэдэгдсэн. Учир нь шүүхээс гэм буруутай нь тогтоогдоогүй тохиолдолд иргэний сонгох, сонгогдох эрх нь нээлттэй байдаг аж. Харин МАХН-ын дарга Н.Энхбаярын хувьд СЕХ-нд бүртгэх асуудал ийнхүү гацаанд ороод байгаа юм. Гэвч СЕХ-ны дарга Н.Лувсанжав “Н.Энхбаярын хувьд шүүх хурал болж, ял авчихаагүй учраас түүнийг УИХ-ын сонгуулийн нэр дэвшигчдэд бүртгэж авах бололцоотой. Бүх юм хуулийн дагуу явна” хэмээн мэдэгджээ.
Гэтэл нэр дэвшигчид энэ сарын 6-нд буюу маргааш гэхэд тодорч дуусах юм байна. Харин асуудалтай, эргэж харах шаардлагатай хүмүүс энэ сарын 8 буюу ирэх баасан гаригийн дотор асуудлаа шийдвэл бүртгэж авах боломжтой аж.
Тэгэхээр МАХН-ын дарга Н.Энхбаярын хувьд шүүхээс яв аваагүй учраас СЕХ-ноос асууж, тодруулах зүйлд албан ёсны хариулт өгөөд СЕХ-нд бүртгүүлэх боломжтой байгаа юм байна.
