НЦГ-ын дарга асан, хурандаа О.Зоригт Цагдан хорих 461 дүгээр ангид хоригдож байгаад өнгөрсөн сарын эхээр Н.П.Шастины нэрэмжит нэгдсэн III эмнэлэгт ирж, хэвтэн өнгөрсөн сарын 28-нд зүрхний титэм судасны хагалгаанд орсон билээ. Харин түүнийг тавдугаар сарын 29-нд зарлагдсан шүүх хуралд оролцуулахын тулд тэргэнцэртэй нь цагдан хорих уруу ачсан юм. Хагалгааных нь сорви аньж амжаагүй байгаа тэрбээр хорихын эмнэлэгт биеийн байдал нь муудсанаас өнгөрсөн пүрэв гаригийн шөнө түргэн дуудаж үзүүлснээр эмчлүүлж байсан III эмнэлэгтээ хүргэгдэн иржээ.
Харин түүнтэй хамт эмнэлгээс хорих уруу ачигдсан Ч.Амарболдыг ч мөн биеийн байдал нь тааруу байна хэмээн эмч нар авч явах гэсэн боловч тэрээр өөрөө зөвшөөрөөгүй байна. Учир нь маргааш болох шүүх хуралд дахиад дамнуургатай нь ачаад авчрах байх. Тиймээс олон дахин нааш цааш явалгүй эндээ үлдье гэсэн хүсэлтийг тавьснаар хорихын эмнэлэгт үлдсэн байна.
Түүнчлэн Нийслэлийн өмгөөлөгчдийн зөвлөл /НӨЗ/-өөс хурандаа нарт өмгөөлөгч томилоод байгаа. Харин О.Зоригт өөрт нь томилоод байсан Р.Ундрах өмгөөлөгчөөс хууль зүйн туслалцаа авахгүй гэдгээ илэрхийлээд байгаа бөгөөд шинээр Ч.Өнөрбаяр гэдэг өмгөөлөгчтэй уулзсан байна. Мөн Ч.Амарболд генералын хувьд академич С.Нарангэрэл өмгөөлөгчтэй уулзаж байгаа аж. Харин Г.Ганбаатар, Ш.Батсүхийн нарын зүгээс шинээр өмгөөлөгч сонгоогүй байгаа аж.
