Уг мэдэгдэлд, “Монгол Улсын Их Хурлын 2012 оны ээлжит сонгууль эхэлж, нам эвсэл, түүний нэр дэвшигчид шинээр батлагдсан Сонгуулийн тухай хуулийн хүрээнд сонгуулийн суралчилгаагаа эхлүүлээд байна. Сонгуулийг шударга, булхай луйваргүй явуулж ард олны сонголтыг үнэн зөвөөр сонгуулийн дүнд тусгах талаар Ардчилсан нам, түүний дотор Өвөрхангай аймгийн Ардчилсан намын баримталж буй байр суурь тууштай байгаа билээ.
АН-аас нэр дэвшигчдийн эсрэг иргэн Т.Хасбаатарын хэвлэлээр тарааж буй үндэслэлгүй гүтгэлэг, удаа дараагийн үйл ажиллагаа нь АН-ын үндсэн дүрмийн холбогдох заалтуудыг зөрчсөн үйлдэл юм. АН-аас нэр дэвшиж буй Г.Батхүү, Д.Зоригт нар УИХ-ын Сонгуулийн тухай хуулийг зөрчөөгүй, хуулийн хүрээнд сурталчилгаа явуулж байгааг албан ёсоор мэдэгдэж байна” гэжээ.
Т.Хасбаатар Өвөрхангай аймгийн Ардчилсан намын даргаар сонгогдсоноосоо хойш ажлаа цалгардуулан улстөрийн хариуцлага алдсан байна. Тиймээс Аймгийн намын хороо хуралдаанаараа Ардчилсан намын үндсэн дүрмийн хүрээнд авч хэлэлцэн Аймгийн намын даргын сонгуульт ажлаас огцруулжээ. Түүнчлэн намынхаа эсрэг, намаас нэр дэвшигчдийн эсрэг баримт нотолгоогүй гүтгэлгийг олон нийтэд тарааж хууль бус үйл ажиллагаа явуулсан тул Аймгийн намын хорооны Зөвлөлдөх зөвлөл Ардчилсан намын үндсэн дүрмийн хүрээнд дахин авч хэлэлцсэн байна.
Ингээд Т.Хасбаатарын дээрх үйлдлүүд нь Ардчилсан намын үндсэн дүрмийн 3.3.1, 3.3.4, 3.3.5, 3.3.6 дахь заалтуудыг зөрчсөн тул түүнийг Ардчилсан намаас хөөх саналаа намын эрх бүхий байгууллагад гаргажээ. Үүний зэрэгцээ Өвөрхангай аймгийн МАН-ын хороо 2012 оны зургадугаар сарын 1-ний өдөр УИХ-ын сонгуулийн аравдугаар тойргийн хороонд хандаж АН-аас нэр дэвшигчид, түүний Сонгуулийн штабыг гүтгэсэн буруу ташаа мэдээллийг эш үндэс болгон, мөн сурталчилгаатай холбоотой үндэслэлгүй гүтгэлгийг хийсэн байна.
Тиймээс цаашид намын дотоод хэрэгт оролцон асуудлыг сонгуулийн үйл явцад ашиглаж улстөрийн соёлгүй байдал гаргахгүй байхыг УИХын сонгуульд оролцож буй бусад улстөрийн нам, эвсэл, нэр дэвшигчдэд хандан уриалж байгаагаа Өвөрхангай аймгийн АН-ын зүгээс мэдэгдлээ.
