УДБЭТ-ын гоцлол дуучин, гавьяат жүжигчин Э.Амартүвшин Бээжин хотод болох Пласидо Домингогийн нэрэмжит дэлхийн дуурийн дуулаачдын XX тэмцээнд өрсөлдөхөөр Бээжин хотыг зорилоо. Энэ тэмцээн зургаадугаар сарын 7-ноос 10-ны хооронд Бээжингийн олимпийн үеэр баригдсан "Шувууны үүр" театрт болох аж. Тэмцээнд 18-32 насны шалгаруулалтанд тэнцсэн 40 мэргэжлийн дуучин өрсөлдөх юм байна.
     Пласидо Домингогийн нэрэмжит тэмцээнд амжилттай оролцвол дэлхийн хэмжээний тоглолтуудад оролцох боломжтой болдог байна. Мөн уралдааны тэргүүн байрт хоёр хүнийг шалгаруулж, тус бүр 30 мянга доллар олгох бол II байр тус бүр хоёр хүн 20 мянган доллар, III байр тус бүр хоёр хүн 10 мянган доллар, тусгай байрын таван шагналыг 10-15 мянган ам.доллар дагалдах гэнэ. Уг тэмцээн 1993 оноос хойш жил бүр уламжлал болон олон оронд зохиогдсоор иржээ. Харин Хятад улсад анх удаа болж байгаа юм.