Өнгөрсөн дөрөвдүгээр сарын 23-нд Баянгол дүүргийн VI хороо, 25 дугаар эмийн сангийн урд замд согтуугаар тээврийн хэрэгсэл жолоодож яваад гарцаар зам хөндлөн гарч явсан 10 настай хүүхдийг дайрч, амь насыг нь хөнөөсөн Ш.Алтанхуягийн бие өнгөрсөн сарын 29-нд муудсан талаар мэдээлсэн. Хэдийгээр биеийн байдал нь муудсан ч шинжилгээ хийлгээд, цагдан хорих 461 дүгээр ангийн эмнэлэгт хэвтэн эмчлүүлж байгаа. Харин түүнийг батлан даалтад гарч, эмчилгээ хийлгэж байгаа хэмээн хэвлэлээр гарчээ.
Энэ талаар ЗЦГ-ын олон нийттэй харилцах тасгийн ажилтанаас тодруулахад, “Ш.Алтанхуягийг өнгөрсөн сарын 29-ны өдөр шинжилгээ өгүүлэхээр түр хугацаагаар Цагдан хорих 461 дүгээр ангиас гаргасан. Шинжилгээ өгсөний дараа буюу тэр өдөр нь түүнийг хорих ангид буцаан аваачсан. Түүнийг батлан даалтад гаргаагүй, мөрдөн байцаалтын шатанд явж байгаа” гэсэн юм.
Тэрээр осол гаргах үедээ 70 хувийн согтолттой, өөрийгөө хянах чадвараа алдсан байсан нь мөрдөн байцаалтаар тогтоогдсон юм. Ш.Алтанхуяг нь “Хишигтэн нүүдэлчин” гэх “Мон дулаан трейд” компанийн охин компанийн гүйцэтгэх захирлаар ажилладаг аж.
Б.Чимэг
