Өдгөө 97 настай Олив Хорелл нь АНУ-ын Монтана мужид төрж өссөн бөгөөд түүнийг бага байхад гэрт нь цахилгаан, боловсон бие засах газар байхгүй байснаас гадна тэрээр морь унаж явдаг байсан талаараа дурсамжаа хуваалцжээ. Дараа нь тэрээр Калифорни мужийн Сакраменто хотод шилжин суурьшиж, мужийн албанд насаараа ажилласан байна. Одоо Санта Роса хотын ахмадын асрамжийн газар амьдарч байгаа Олив Хорелл өндөр настнуудын хүслийг биелүүлдэг "Wish of a Lifetime" хэмээх хөтөлбөр байдгийг олж мэдэн, энэхүү хөтөлбөрт хандсанаар ийнхүү Google компаний төв байранд зочилсон байна. Тэрээр ирээдүйг урьдчилан харах зорилгоор Google-ийн төв байранд зочлох хүсэлт тавьсан талаараа хэлжээ. Түүний хүсэлтийг компаний зүгээс хүлээн авч, өөрийн төв байрандаа урин, хамгийн сүүлийн үеийн дэвшилтэт технологиудыг танилцуулсан байна. Google компаний зүгээс Олив Хорреллийг жолоочгүй автомашинд суулган, виртуал ертөнц дэх бодит мэт мэдрэмжийг мэдрүүлэх гэх мэт олон сонирхолтой шинэ технологиудыг үзүүлжээ. Google компаний ажилтан, албан хаагчдын зүгээс 97 настай Олив Хоррелийн өдий насан дээрээ эрч хүчтэй байгаа байдал болон шинийг сурч мэдэх гэсэн эрэлхийлэл, хүсэл эрмэлзлийг нь гайхан, биширсэн талаараа сэтгэгдлээ хуваалцжээ.

Ганбаатар Мөнх-Эрдэнэ /UBS/