Алтай таван богд Баян-Өлгий аймгаас сонгуулийн сурталчилгаагаа эхлүүлсэн АН-ын дарга Н.Алтанхуяг, зөвлөх С.Отгонбаяр, АН-ын жагсаалтын 18-д жагссан залуусын төлөөлөл болох А.Эрдэнэбүрэн нар Увс аймгийн Өмнөговь суманд иргэд сонгогчидтой уулзаж байна. Увс аймагт АН-аас Д.Нямхүү, Т.Мэндсайхан нар дэвшиж байгаа бөгөөд тэдний хувьд иргэдэд “Монгол хүн” хөтөлбөрөө танилцуулж, хүний хөгжлийн асуудалд түлхүү анхаарсан хүн төвтэй хөтөлбөр болсон гэдгийг тайлбарлалаа.
АН-ын дарга уулзалтын үеэр үг хэлэхдээ “Сая Баян-Өлгий аймгаас Увс аймгийнхаа Ховд сумын нутаг орж ирэхдээ их билэгшээлтэй нүүдэлтэй таарлаа. Айл зусландаа нүүж байна. Үүнтэй адил Увсынхан бууриа сэлгэж, нүүүдэл хийх цаг болжээ. Ардчилсан нам Увс аймагт Т.Мэндсайхан, Д.Нямхүү гэсэн хоёр залууг дэвшүүлсэн. Т.Мэндсайханы хувьд Монголдоо төдийгүй Олон улсад танигдсан хуульч. Монгол Улсаа төлөөлөн олон улсад өмгөөлөл хийж байна. НХХ-ийн дэд сайд Д.Нямхүү бол Нийгмийн хамгааллын салбарт чамгүй туршлагатай. Манай хоёр нэр дэвшигчийн хувьд нийгмийн чиг баримжаатай, хүний төлөө, нутаг орныхоо төлөө зүтгэж чадах залуус учраас АН та бүхэнд илгээж байна. Та бүхэндээ ч итгэж байна. Ардчилсан намын цаг иржээ. Ардчиллын залуусыг гаргах цаг болжээ. Нийгэмдээ салхи оруулъя. Баян-Өлгий аймагт гэхэд ардчиллын салхи хүчтэй салхилж байна. Та бүхнийг Баян-Өлгийчүүдээс дутахгүй гэдэгт найдаж байна” гэлээ.
АН-ын дарга өнөөдөр орой Увс аймгийн төвд иргэд, сонгогчидтой уулзалт хийнэ.
