Долдугаар сарын 1-ний хэрэгт буруутгагдаад буй цагдаагийн экс дарга нарт холбогдох шүүх хурал өнөөдөр ШШГЕГ-ын харьяа цагдан хорих 461 дүгээр ангид болно. Ингэснээр тус дарга нарт холбогдох хэрэг долоо дахь удаагаа товлогдож байгаа юм. Өмнө нь өмгөөлөгч үйлчлүүлэгчдээсээ татгалзсан, үйлчлүүлэгч нь өмгөөлөгч нараасаа татгалзсан, өмгөөлөгч нар нь хавтаст хэрэгтэй танилцаагүй, шүүгдэгч нарын биеийн байдал муу гэх шалтгаанаар зургаан удаа хойшилсон.Тэднийг Эрүүгийн хуулийн тусгай ангийн 274 дүгээр зүйлийн 274.2, 294 дүгээр зүйлийн 294.2 дахь хэсэгт зааснаар цэргийн албаны эсрэг гэмт хэрэг үйлдсэн, эрх мэдлээ урвуулан ашиглах, хэтрүүлэх, хэрэгжүүлэхгүй байх гэсэн үндэслэлээр буруутган шүүх юм.
Хуралд даргалагч шүүгчээр Ч.Хосбаяр, шүүгчээр М.Алдар, С.Оюунчимэг, улсын яллагчаар С.Хишигжаргал, Ц.Уртнасан, хохирогчдын өмгөөлөгчөөр О.Баасанхүү, шүүгдэгч ЦЕГ-ын даргын үүрэг гүйцэтгэгч, хошууч генерал Ч.Амарболдын өмгөөлөгчөөр академич С.Нарангэрэл, Нийслэлийн цагдаагийн газрын дарга асан, цагдаагийн хурандаа О.Зоригтын өмгөөлөгчөөр Ё.Өнөрбаяр, Нийслэлийн цагдаагийн газрын Хэв журмын хэлтсийн дарга асан, хурандаа Г.Ганбаатарын өмгөөлөгчөөр С.Тэгшжаргал нар оролцохоор болсон байна.
Гэвч өнөөдөр товлогдсон шүүх хурал дахин хойшлох магадлалтай болжээ. Учир нь Нийслэлийн өмгөөлөгчдийн зөвлөлөөс шүүгдэгч нарт Ж.Батхүү, А.Ундрах, М.Алтан-Өлзий, Б.Баяр нарын өмгөөлөгчдийг томилоод байсан. Харин уг томилгоог шүүгдэгч нар эсэргүүцэж, өнгөрсөн даваа гаригаас эхлэн өөрсдөө өмгөөлөгчдөө сонгосон байна. Тэгэхээр хоёр хоногийн өмнө сонгогдсон шинэхэн өмгөөлөгч нар өнөөдрийн шүүх хуралд хавтаст хэрэгтэй танилцахгүйгээр орж байгаа юм байна. Өмгөөлөгч нар хавтаст хэрэгтэй танилцаагүй үед шүүх хурлыг явуулах боломжгүй аж. Мөн Ч.Амарболдод өмгөөлөл үзүүлэхээр болоод С.Нарангэрэл татгалзсан хариуд өгөөд байгаа юм байна.
Түүнчлэн хурандаа О.Зоригтын биеийн байдал нь эрс муудан, өнгөрсөн пүрэв гаригийн шөнө Н.П.Шастины нэрэмжит гуравдугаар эмнэлэгт хүргэгдсэн. Тэрээр өнгөрсөн сарын 25-нд зүрхний титэм судасны хагалгаанд орон, тус эмнэлэгт эмчлүүлж байсан ч өнгөрсөн тавдугаар сарын 29-нд зарлагдсан шүүх хуралд оролцуулахын тулд тэргэнцэртэй нь цагдан хорих уруу ачсан юм.
Тус хуралд хагалгаа хийлгээд хоёрхон хонож байсан О.Зоригт, Ч.Амарболд нарыг Сүхбаатар дүүргийн шүүхээс сүр дуулиан болгон цагдан хорих төвд аваачсан ч тэдний биеийн байдал муу хэмээн хурлыг хойшлуулсан. Гэвч хагалгааных нь сорви нь ч аньж амжаагүй байхдаа хорихын эмнэлэгт хүргэгдсэн О.Зоригт биеийн байдал нь улам муудсан учир дахин гуравдугаар эмнэлэгт хүргэгдсэн юм.
Хэдийгээр түүнтэй хамт эмнэлгээс хорих уруу ачигдсан хошууч генерал Ч.Амарболдын биеийн байдал таагүй байгаа ч тэрээр өөрөө эмнэлэг рүү явахыг зөвшөөрөөгүй. Учир нь эмнэлэгт хүргэгдсэн ч өнөөдрийн шүүх хуралд дахиад дамнуургатай нь ачаад авчрах байх. Тиймээс олон дахин нааш цааш явалгүй эндээ үлдье гэсэн хүсэлтийг тавьснаар хорихын эмнэлэгт үлдсэн юм.
Тэгэхээр өнөөдрийн шүүх хуралд О.Зоригт хурандааг дахин тэргэнцэртэй аваачих уу, хавтаст хэрэгтэй танилцаагүй өмгөөлөгч нартай шүүх хурлыг явуулах уу гэх эцсийн шийдвэрийг Сүхбаатар дүүргийн шүүгч Ч.Хосбаяр гаргах үлдлээ.
/24tsag.mn/
