2008 оны долдугаар сарын нэгний шүүх хурал зургаан удаа хойшлогдсон ч өнөөдөр үйл явц тун хурдацтай өрнөж байна. Шүүгдэгч О.Зоригт, Ш.Батсүх, Г.Ганбаатар, Ч.Амарболд нар "Бид шүүхийн мөрдөн байцаах ажид саад учруулахгүй байгаа, заримынх нь бие муу байгаа тул батлан даалтанд гаргаж өгнө үү?" гэсэн хүсэлт гаргасан юм. Мөн өчигдөрхөн томилогдсон өмгөөлөгч нар нь хавтас хэрэгтай танилцаж амжаагүй байгаа тул хурлыг хойшлуулж өгөхийг хүссэн ч шүүгч нар татгалзсан хариу өгч, үргэлжлүүлэхээр болсон. Одоогийн байдлаар Ш.Батсүхийн өмгөөлөгчөөр М.Алтан-Өлзий, Г.Ганбаатарын өмгөөлөгчөөр Т.Мөнхгэрэл, Ч.Амарболдын өмгөөлөгчөөр Ж.Яринпил нар оролцож байгаа бол О.Зоригт өөрийгөө өмгөөлөхөөр болоод байна. Гэсэн ч Т.Мөнхгэрэл өмгөөлөгч 29 хуудас хавтас хэргийн заримтай нь л танилцсан бол нөгөө хоёр өмгөөлөгч нь өчигдөр томилогдсон тул хэрэгтэй огт танилцаагүй байгаа юм.Иймээс цагдаагийн экс дарга нарын өмгөөлөгчид хавтас хэргийн талаар тодорхой мэдээлэлгүй байгаагийн улмаас улсын яллагч, шүүгч нартай мэтгэлцэх боломжгүй болж байгаа юм.
Тэднийг Эрүүгийн тухай хуулийн 274.2 болон 294.2 дахь заалтаар буруутган шүүж байгаа. Энэ заалтад 5-10 жил хорих ял онооно гэж заасан байдаг аж. Хамгийн ноцтой нь энэ зүйл, ангиар шийтгэгдсэн бол ямар нэгэн өршөөлийн хуульд хамрагдах боломжгүй байдаг.
Эмнэлэгт хэвтэж байсан О.Зоригтыг шөнө дөлөөр хорих ангид авчирч, хэдхэн цагийн өмнө албадан томилсон, хавтаст хэрэгтэй танилцаагүй өмгөөлөгч нартайгаар шүүх хурал үргэлжилж байгаагаас харахад О.Зоригт, Ш.Батсүх, Г.Ганбаатар, Ч.Амарболд нарт өнөөдөр ял оноох нь тодорхой болоод байна. Энэ нөхцөл байдлыг хуульчаас тодруулахад "Өөрөө өөрийгөө өмгөөлдөг, шүүх хуралд өмгөөлөгч нь хавтаст хэрэгтэй огт танилцаагүй оролцож байсан практик байхгүй" гэж тодотгосон юм.
Хохирогч нарын зүгээс өглөө өмгөөлөгч нарт хавтас хэрэгтэй танилцах цаг өгөхийг хүссэн ч шүүгчид хүлээж аваагүйг дашрамд дурдъя. Цагдаагийн ар гэрийнхэн "шүүгч нар ингэж улайм цайм яллахаар зүтгэж байгаад цочирдож байна" гэжээ.
