Долдугаар сарын 1-ны хэрэгт буруутгагдаад буй цагдаагийн экс дарга нарын шүүх хурал үргэлжилж байна. Хэдийгээр хурандаа О.Зоригтын биеийн байдал муудсан ч түүнд тариа хийн, дамнуурган дээр суулгаж хурлыг үргэлжлүүлж байгаа. Мөн хохирогч Ц.Энхбаяр “Ийм хууль бус шүүх хуралд оролцмооргүй байна. Шүүгдэгч нар өөрсдийгөө өмгөөлж, хавтаст хэрэгтэй танилцаагүй өмгөөлөгчид хуралд оролцож байгаа нь хууль бус. Мөн хохирогч, шүүгдэгч, өмгөөлөгчдийн зүгээс гаргасан хүсэлтийг шүүх бүрэлдэхүүн хүлээж авахгүй шүүх хурлыг явуулж байна” хэмээн хурлыг орхин гарсан ч хурал үргэлжилсээр. Харин шүүх хурлыг даргалагч шүүгч Ч.Хосбаяр Ц.Энхбаярын өмгөөлөгч О.Баасанхүүг “Хохирогчийг олж ирж, хуралд оруул. Хэрвээ тэгэхгүй бол өмгөөлөгчийнх нь хувьд торгох арга хэмжээ авна” гэжээ. Харин үүний хариуд О.Баасанхүү өмгөөлөгч өмгөөлөл үзүүлэх эсэхээ шийднэ хэмээн мэдэгджээ. Учир нь О.Баасанхүү өмгөөлөгчийн хувьд ч хохирогч Ц.Энхбаяртай адил шүүх хурлыг учир дутагдалтай болж байна хэмээн шүүмжилж байгаа юм. Б.Чимэг
