Энэ онд болох АНУ-ын Ерөнхийлөгчийн сонгуулийн сунгаанд Бүгд Найрамдах намаас өрсөлдөж буй тэрбумтан Дональд Трамп Исламын шашинтнуудыг эх орондоо оруулахгүй байхыг уриалсан нь өрнөдийн орнуудад хүчтэй эсэргүүцэлтэй тулгараад байгаа юм. Их Британи улсын Засгийн газар Трампыг өөрийн улсад нэвтрүүлэхгүй байх саналыг хүлээн авч энэ талаар хэлэлцлээ. Хэлэлцээрийн дүнд Дональд Трампад хориг тавих нь АНУ-ын эсрэг үйлдэл болно хэмээн сэрэмжилжээ.

Их Британий хуулиар цахимаар гарын үсэг зурсан 100,000-аас дээш санал ирсэн тохиолдолд тухайн асуудлыг Парламентаар авч хэлэлцэх ёстой юм байна. Гэвч Дональд Трампыг Их Британий хил давуулахгүй байхыг шаардсан өргөдөл гомдолд 574,000 хүн гарын үсэг зуржээ.

Даваа гаригт Британий хууль тогтоогчид энэ талаар нухацтай авч хэлэлцсэн юм. Хэдийгээр АНУ-ын Ерөнхийлөгчийн сонгуулийн сунгаанд өрсөлдөж буй тэрбумтан Трамп бүдүүлгээр хэлэхэд тэнэг, марзан этгээд ч гэлээ түүнийг улсынхаа хилээр оруулахгүй байх нь улс хоорондын харилцаанд сөрөг нөлөө үзүүлэх эрсдэл дагуулна гэж харж байна.

Их Британий Хөдөлмөрчдийн намын эрх баригч Пауль Флинн Дональд Трамд Исламчуудад хориг тавихыг уриалсны дараа өөрт нь ч мөн адил хориг тавих ёстой гэж үзсэн юм. Харин Шотландын Үндэсний намын гишүүн Гэвин Ньюлэндс хоригийн эсрэг байр сууриа илэрхийлжээ. Энэ мэтчилэн санал зөрөлдөөнтэй эхэлж хэдэн цаг үргэлжилсэн хэлэлцүүлэг санал хураалт явуулалгүй өндөрлөсөн байна.

Гүрпүрэв Ганчимэг /UBS/