Бельгийн нийслэл Брюссельд төвтэй Олон улсын сэтгүүлчдийн холбоо сүүлийн сэтгүүлзүйн салбарын үйл ажиллагааны талаар 80 орчим хуудас бүхий тайлан мэдээ танилцууллаа. Үүнд ойрын 25 жилд 2,300 орчим сэтгүүлч үүрэгт ажлаа гүйцэтгэж яваа амиа алдсан болохыг мэдээлжээ.

Тодруулбал 2,297 сэтгүүлч амиа алдсанаас 2010 оноос хойш жилд 100-аас доошгүй сэтгүүлч амь үрэгджээ. Олон улсын сэтгүүлчдийн холбооны Ерөнхий нарийн бичгийн дарга Энтони Беллангерын хэлснээр 2005 оноос хойш ойрын 10 жил хэвлэл мэдээллийн ажилтнуудын хувьд хамгийн их эрсдэлтэй, аюултай он жилүүд байсан байна.

Ойрхи Дорнодын хувьсгал, Ази-Номхон далайн орнуудад гарсан үймээн самууны үеэр сэтгүүлч сурвалжлагчид хамгийн их амиа алджээ. Тэр дундаа Ирак улсад хэвлэл мэдээллийн салбарын хамгийн олон ажилтан амь эрсэдсэн байна. Тус улсад 1990 оноос хойш 309 сэтгүүлч амь насаараа хохирчээ. АНУ-ын Засгийн газрын 2003 оноос Иракт явуулсан цэргийн ажиллагааны үеэр сэтгүүлч сурвалжлагчид хамгийн их эрсдэлд орсон байна.

Дараа нь Филиппин болоон Мексик улс оржээ. Филиппинд 146, Мексикт 120 хэвлэл мэдээллийн ажилтан амиа алдсан байна.

Гүрпүрэв Ганчимэг/UBS/