Үзэгчдийн талархалыг хүлээгээд байгаа "Оюунлаг" продакшны шинэ уран бүтээл "Туршилтын хосууд" уран сайхны кино үзэгчдийг байлдан дагуулж байна. Өнгөрсөн долоо хоногт нээлтээ хийсэн энэхүү киноны хөгжилтэй басхүү сонирхол татсан үйл явдлууд нь ёстой л үзсэн нэгний элгийг нь авч байгаа гэнэ.
"Туршилтын хосууд" бүх кино теартуудад гарч байгаа ч тасалбар эрэлт ихтэй байгаа аж. Инээдмийн киноны төрөлд тэсрэлт болоод байгаа нь энэхүү кинонд жүжигчин Р.Адъяа, Б.Хулан, СТА, жүжигчин Г.Золбоот, Ааяа, Ц.Дэлгэрсайхан нарын нэр хүндтэй олон уран бүтээлчид тоглосон юм.
Жүжигчин Р.Адъяа, Б.Хулан нар тус кинонд туршилтаар хосууд болдог байна. Үзэгч та бүхэн энэхүү киноноос залуусын ариун нандин хайр дурлал тэдэнд тохиолдсон хөгжилтэй явдлуудыг харах болно. Жүжигчин Б.Хулан кино зураг авалтын үеэр хөлөө хугалсан ч уран бүтээлч хүний тэсвэр, хатуужил гаргаж зураг авалтаа дуусгажээ.
Киноны Ерөнхий найруулагч Д.Отгонбаяр ажилласан бөгөөд тэрбээр энэхүү киногоо зохиол найруулгын хувьд шинэлэг өнгө аяс, шийдлийг харуулахаар ажилласан байна. Дашрамд дуулгахад, "Оюунлаг" продакшн нь өмнө нь "Хүүгүй ломбард", "Хуримын сюрприз" зэрэг кино уран бүтээлүүдийг хийж үзэгчдийг хүртээл болгож байсан юм. Харин энэ удаа инээд бэлэглэж, ухаарал хайрлах "Туршилтын хосууд" киног хүргэж байгаа нь ч үзэгчдийн талархалыг хүлээгээд байна.
