Нийслэлийн удирдах ажилтнуудын ээлжит шуурхай зөвлөгөөн болж, Улаанбаатар хотын 2016 оны 08 дугаар сарын 25-наас 09 дүгээр сарын 7-ны өдрийн нөхцөл байдлын талаар холбогдох газрууд мэдээлэл хүргэлээ.
Улаанбаатар хотын цагдаагийн газрын дарга, туслах комиссар Ч.Болдбаатарын мэдээлснээр 2016 оны 08 дугаар сарын 25-ны өдрөөс 2016 он 09 дүгээр сарын 07-ны өдрүүдэд иргэд, аж ахуйн нэгж байгууллагаас гэмт хэрэг зөрчлийн шинжтэй 12 мянга 963 мэдээ, мэдээлэл хүлээн авсныг өмнөх 14 хоногтой харьцуулахад 1074 нэгж буюу 9.0 хувиар өсч, 2367 гэмт хэргийн шинжтэй гомдол мэдээлэл бүртгэгдсэн нь 125 нэгж буюу -5.0 хувиар буурчээ. Энэ хугацаанд:
Баянгол дүүрэгт - 529 Хан-Уул дүүрэгт - 197
Баянзүрх дүүрэгт - 586 Чингэлтэй дүүрэгт - 298
Сүхбаатар дүүрэгт - 302 Налайх дүүрэгт - 22
Сонгинохайрхан дүүрэгт - 409 Багануур дүүрэгт – 22 гэмт хэрэг бүртгэгдэж, Багахангай дүүрэгт 2 гэмт хэрэг, зөрчлийн дуудлага мэдээлэл бүртгэгдсэн байна.
Гэмт хэргийн шинжтэй гомдол мэдээллийг төрлөөр нь ангилбал,
913 буюу 38.6 хувь нь бусдын эд хөрөнгийг хулгайлах
354 буюу 15.0 хувь нь бусад төрлийн
277 буюу 11.7 хувь нь бусдын бие махбодид гэмтэл учруулах
247 буюу 10.4 хувь нь бусдын эд зүйлийг залилан мэхлэх
190 буюу 8.0 хувь нь танхайрах
43 буюу 1.8 хувь нь бусдын эд хөрөнгийг дээрэмдэх
84 буюу 3.5 хувь нь амиа хорлосон болон золгүй явдлын улмаас
31 буюу 1.3 хувь нь бусдын эд хөрөнгийг булаах
18 буюу 0.8 хувь нь хүчиндэх гэмт хэрэг бүртгэгджээ.
Мөн нийслэл хотын цагдаагийн албан хаагчид “Цахим тоглоомын газрын үйл ажиллагааг зохицуулах журам”-ыг хэрэгжүүлэх ажлын хүрээнд энэ чиглэлээр үйл ажиллагаа явуулдаг 50 цахим тоглоомын газар, 10 интернэт кафег шалгаж, цагийн хуваарийн хэрэгжилтэд хяналт тавьж ажилласан байна.
НОБГ-ын дарга, хурандаа Н.Уламбаярын мэдээлснээр 2016 оны наймдугаар сарын 29-нөөс есдүгээр сарын 12-ны хооронд нийслэлийн хэмжээнд аюулт үзэгдэл, техникийн холбогдолтой ослын 58 удаагийн дуудлага ирсэнээс объектын гал түймрийн 44 дуудлага, техникийн холбогдолтой осол, аврах ажиллагааны 14 удаагийн дуудлагатай байжээ. Дээрхи дуудлагыг өнгөрсөн 14 хоногтой харьцуулахад нийт аюулт үзэгдэл, техникийн холбогдолтой ослын тоо -27.5 хувиар, объектын гал түймрийн тоо -21.4 хувиар тус тус буурчээ. 2016 оны 09 дүгээр сарын 06-ны өдөр БГД-ийн 2-р хороо 54-р байрны 1-р орцонд гарсан гал түймрийн утаажилтын бүсээс 26, ахуйн болон техникийн холбогдолтой ослоос 2 хүний амь биеийг аварч, 5 хүнд эмнэлгийн анхан шатны тусламжийг үзүүлсэн байна.
Малын гоц халдварт шүлхий, цэцэг өвчний нян хүн, тээврийн хэрэгслийн хөдөлгөөнөөр зөөгдөн орж ирэхээс урьдчилан сэргийлэх зорилгоор Багахангай дүүрэгт 2, Багануур дүүрэгт 1, Налайх дүүрэгт 2, Хан-Уул дүүрэгт 1, Сонгинохайрхан дүүрэгт 1 хөдөлгөөнт эргүүлийг баталгаат бус замуудад нэмэлтээр хүч нэмэгдүүлэн үүрэг гүйцэтгэж байна.
Мөн нийслэлийн засаг даргын захирамжийн хүрээнд авто тээврийн шалган нэвтрэх товчоодоор хөдөө орон нутгаас зорчин ирсэн нийт 9786 тээврийн хэрэгсэлд үзлэг шалгалт, 20 мянга 628 иргэнд мал, амьтны гоц халдварт өвчнөөс урьдчилан сэргийлэх зөвлөгөө өгч, 100 мянга 638 автомашинд ариутгал халдваргүйжүүлэлт хийжээ.
Харин 08 дугаар сарын 25-наас 09 дүгээр сарын 7-ны өдөр хүртэлх замын хөдөлгөөний нөхцөл байдлын талаар Улаанбаатар хотын цагдаагийн газрын Замын цагдаагийн асуудал эрхэлсэн дэд дарга, хурандаа Ч.Жаргалсайхан мэдээлэл өглөө. Энэ хугацаанд Замын цагдаагийн газрын Мэдээлэл шуурхай удирдлагын хэлтэст 3426 дуудлага мэдээлэл ирснээс хүн гэмтсэн хэргийн шинжтэй 181 осол, зөрчлийн шинжтэй 1730 дуудлаганд очиж хойшлуулшгүй ажиллагаа явуулан 181 хэрэг, 105 ослыг материалжуулан шалгаж байна. Зам тээврийн хэргийн улмаас 6 хүний амь нас хохирчээ. Өнгөрсөн онтой харьцуулахад хэргийн шинжтэй осол 36,1 хувиар, зөрчил 64,1 хувиар тус тус өссөн байна.
Мөн энэ хугацаанд согтуугаар тээврийн хэрэгсэл жолоодсон 753 жолоочийг саатуулсан нь -23,2 хувиар буурсан үзүүлэлт юм. Хүүхэд өртсөн зам тээврийн осол 20 бүртгэгдсэн нь өмнөх онтой харьцуулахад -45,9 хувиар буурсан байна.
НМХГ-аас өгсөн мэдээллээр өнгөрсөн 14 хоногийн хугацаанд төлөвлөгөөт болон төлөвлөгөөт бус шалгалтыг 574 обьектод хийж, 317 зөрчил илрүүлж, 154 зөрчил арилгуулжээ. 15 албан шаардлага, 9 акт, 51 байцаагчийн дүгнэлт үйлдсэн байна.
Ослын хувьд Налайх дүүргийн 1-р хороонд байрлах “Ажиргана” ХХК-ийн байранд барилгын дээврээс хүн унаж, амь насаа алдсан үйлдвэрлэлийн осол гарчээ. Мөн 12 аж ахуйн нэгжийн 15 нэр төрлийн импортын бодис, бараа, бүтээгдэхүүнээс дээж авч лабораторийн шинжилгээнд хамруулсан байна. Тарваган тахал өвчнөөс урьдчилан сэргийлэх ажлын хүрээнд энэ хугацаанд нийт 160 тарвагыг хураан авч зооноз өвчин судлалын үндэсний төвд хүлээлгэн өгч холбогдох иргэдэд 4224,0 төгрөгийн торгуулийн арга хэмжээ авсан. Мөн авто тээврийн шалган нэвтрүүлэх товчоогоор нэвтрэн зорчиж буй нийт 5000 гаруй иргэдэд тарваган тахал өвчнөөс сэргийлэх зөвлөмж, өгч, 500 ширхэг зөвлөмж сэрэмжлүүлэгийн хуудсыг тарааж өгсөн байна. Харин Сонгинохайрхан, Баянзүрх, Багануур, Хан-Уул, Налайх, Багахангай дүүргүүдийн 7 товчоонд өндөржүүлсэн бэлэн байдалд 24 цагийн туршит хүч нэмэгдүүлэн хяналт шалгалтын ажлыг хийн ажилаж байна. Өнгөрсөн 7 хоногийн хугацаанд хууль бусаар түүсэн 10 тонн гаруй кг цайруулсан самрыг илрүүлэн хурааж авч зөрчил гаргасан иргэнд торгууль ногдуулсаныг НМХГ-ын дарга Л.Эрдэнэчулуун танилцууллаа гэж Нийслэлийн ЗДТГ-ын Хэвлэл мэдээлэл, олон нийттэй харилцах хэлтсээс мэдээллээ.
