Сүүлийн үеийн тайз, дэлгэцийн бүтээлд чадварлагаар дүр бүтээж байгаа залуу уран бүтээлч бол УДЭТ-ын жүжигчин Ц.Цэрэнболд. Омголон төрх, баргил хоолойтой түүнд найруулагчид ширүүн зан авиртай хүний дүр бүтээх үүрэг ногдуулах нь олонтаа. Харин жүжигчин залуу үнэн хэрэгтээ ямар хүн юм бол гэдгийг тандаж ярилцлагад урьсан юм.-Завгүй л гүйгээд байна уу?
-Харин тийм ээ. Хэд хоногийн өмнө таныг ярихад бүр ч завгүй байлаа.
-Таныг сонин, сэтгүүлд ярилцлага өгдөггүй болохоор яадаг бол гэж бодсоор юу ч гэсэн театраар тань ороод гаръя гэж бодлоо...
-Юмыг яаж мэдэх вэ, намайг байж магад гэж бодоод уу?
-Харин тийм?
-Би тэр бүр хэвлэлд ярилцлага өгөх дургүй ээ. Гавьяа байгуулсан биш, өмнөх ажлаа л хийгээд явж байвал болоо.
-Таныг үзэгчид сүүлийн үед найруулагчдаас дутуугүй овоо хараандаа аваад байгаа. Зарим нь тантай хийсэн ярилцлага уншихыг хүсч байгаа л болов уу?
-Үзэгчид жүжигчдийг овоо хараандаа авдаг гэж үү.
-Андахгүй шүү дээ. Уран бүтээл сайн байвал уран бүтээлч сайн л гэсэн үг. Тэгээд л мөшгиж эхэлнэ...
-Сүүлийн үеийн уран бүтээл гэвэл “Жек амьд” гэдэг инээдмийн кинонд тоглосон. Найруулагчаар нь “Зөрлөг” киноны туслах дүрд тоглосон Тулгаа ажилласан. Ирэх сарын эхээр нээлтээ хийнэ гэсэн.
-Хэний дүрийг бүтээсэн бэ?
-Хавх. Гэхдээ туслах дүр л дээ. Гол дүрд DOZ энтертайнмент”-ийн захирал Ш.Доржсүрэн болон жүжигчин Б.Лхагвасүрэн нар тоглосон.
-Энэ таны анхны инээдмийн кино юу?
-Тийм.
-Ямар санагдсан бэ?
-Яах вэ. Найруулагч намайг тоогоод тогло гэсэн болохоор гүйцэтгэхээс аргагүй.
-Ер нь та тайз дэлгэцийн хэчнээн бүтээлд тоглоод байна вэ?
-Дэлгэцийн 10 гаруй. Тэднээс дөрөв нь гол дүр. Тайзны бүтээлд ч мөн адил.
-Таны тоглосон дүрүүд ихэвчлэн хурц, догшин авиртай. Ийм дүр бүтээх нь таны нэг онцлог уу?
-Ийм дүрд тоглож байгаа олон жүжигчин байгаа шүү дээ. Тиймээс миний онцлог гэж арай хэлж болохгүй. Гэхдээ миний гадаад төрхөөс шалтгаалж найруулагчид надад ийм дүр өгдөг байх.
-Цаашдаа ийм дүрээр дагнах уу?
-Үгүй. Аль болох зугтахыг хичээдэг.
-Яагаад?
-Нэг төрлийн дүрд олон удаа тогловол хэвшинэ. Жүжигчин хүн ямар ч дүрд тоглох ёстой. Тиймээс би ширүүн, дошгин гэхээс эсрэг дүрд тоглохыг хүсч байна. Яваандаа болно биз дээ. Одоогоор ахмад болон хамтран, ажилладаг залуу жүжигчдээсээ суралцаад явж байна.
-Дууны тань өнгө ч найруулагчдын сонирхлыг татдаг байх даа?
-Үүнийг ёстой хэлж мэдэхгүй байна. Аав ээжээс царгиадуу хоолой заяасанд баярладаг.
-Таны бага нас хэрхэн өнгөрсөн бэ?
-Миний төрсөн нутаг Налайх дүүрэг. Аав ээж маань уурхайчин. Гэхдээ одоо тэтгэвэрт гарсан л даа. Намайг дунд ангид сурч байхад манайх Багануур дүүрэг рүү шилжсэн юм. Аав маань 1996-1999 онд Галаас хамгаалах 64 дүгээр ангид жолоочоор ажиллаж байлаа. Тиймээс би манайхан хаашаа нүүнэ дагаад л явна шүү дээ.
-Нэг газраас нөгөөд шилжиж очиход орчиндоо дасах гэдэг хэцүү байсан уу?
-Амархан. Багаасаа зарим айлын хүүхэд шиг хаа явсан газраа аав, ээжийгээ дагуулаад байдаггүй байсан болохоор дунд, ахлах ангид орохдоо биеэ даагаад сурчихдаг юм билээ.
-Гар зөрүүлэх тохиолдол байсан биз. Тиймэрхүү дүрд ихэвчлэн тоглосон болохоор сонирхоод асууж байна л даа?
-Эрэгтэй хүүхдүүдэд тааралгүй яах вэ. Би Налайх дүүргийн тавдугаар хорооны хүүхэд. Хороогоороо талцаж байгаад чулуугаар байлдана. Мөн гэр хорооллын хүүхдүүд эрт тусад ордог шүү дээ. Нүүрсэнд ч явна, усанд ч гүйнэ. Түрж дийлэхгүй байж том савтай ус тэргэн дээрээ тавьчихаад зүтгэнэ. Тэр бүхнийг эргэн санахад бор ажил үзсэн хүүхдүүд амьдралыг арай бодитойгоор хардаг юм шиг санагддаг.
-Таныг урлагийн хүн болоход юу нөлөөлсөн бэ?
-Багануурт аав ажилладаг болсон гэж дээр хэлсэн шүү дээ. Тэр үед байгууллагуудын дунд АСК шиг тэмцээн зохион байгуулдаг байлаа. Тэнд би орж дуулж, бүжиглэхдээ жигтэйхэн дуртай. Хамгийн сайхан нь жүжигчин Д.Бямбацогт (салхи Дамбий) ах тухайн үед тус дүүргийн Соёлын төвийн дарга байсан юм. Чөлөөт цагаараа бидэнтэй сургуулилалт хийнэ. Тэр үед Д.Бямбацогт ах “Чиний хоолойны өнгө, жүжиглэх чадвар гайгүй юм. Жүжигчин бол” гээд. Ээж маань намайг “Аав ээжийгээ дагаж явсаар мэргэжилгүй болох нь" гэж санаа нь зовж байсан болохоор тэгж хэлснийг нь их дэмжсэн.
-Тэгээд “Мюзикл” дээд сургуульд орсон юм уу?
-Үгүй. Эхлээд дуучин болдог баатар болоод СУИС-д шалгалт өгтөл тэнцээгүй. 1999 онд шүү дээ. Тэгээд сэтгэлээр унасан амьтан явж байтал СУИС-ийн самбарт “Мюзикл” дээд сургуульд театр урлагийн ангид оюутан элсүүлж авна гэсэн зар байв. Ингээд зарын дагуу явж очоод шалгалтаа өгөөд тэнцсэн. Тухайн үед ээж маань өмнөх сургуульдаа тэнцээгүй болохоор дараагийнхад нь бас тэнцэхгүй биз гэж бодож байсан гэсэн. Ээжийгээ нэг удаа ч гэсэн тэгж баярлуулсандаа өөртөө баярладаг.
-Хэн багшаар хичээлээ заалгаж байв?
-Гавьяат жүжигчин Л.Чаминчулуун, урлагийн гавьяат зүтгэлтэн, найруулагч Ч.Ганхуяг, дуурийн дуучин Баадайжав нараас эхлээд олон багшаар заалгасан.
-Урлагийн гэр бүлд өсөөгүй танд урлагг зүтгэхэд их мэрийлт шаардагддаг байв уу?
-Анх дуучин болно гэсэн бодолтой Багануураас ирээд жүжигчин болсон болохоор надад ирэх хувь тохиол энэ юм байлгүй гэж бодоод хичээхээс аргагүй болсон. Багануурт байхад байгууллагууд хооронд дууны уралдаан зохион байгуулахад би аавынхаа ажлын нэр дээр орж гуравдугаар байр эзэлсэн юм Түүний дараахан Д.Бямбацогт ах “Дуучин бол” гэсэн болохоор тэр үед өөрийгөө “том” дуучи болчихсон мэт санаж явлаа.
-Таны анхны дүр юу байв?
-Оюутан байхад олон сайхан мөрөөдлөөр жигүүрлэж байлаа. Ганц удаа тайзан дээр гараагүй хэрнээ жүжигчин болчихсон юм шиг өөрийгөө тооно шүү дээ. Миний анхны тайзны бүтээлд тоглосон дүр бол “Aтга нөж”-ийн Алтан хучир. Тэр жүжиг туслах олон дүртэй энэ дүр надад ногдсонд би маш их баярладаг. Харин дэлгэцийн бүтээлд “Чингис хаан” киноны Жамухын дүрд тоглосон.
-Тэгвэл тайз, дэлгэцийн анхны бүтээлээ түүхэн дүрээр эхэлсэндээ бэлгэшээдэг байх нь?
-Тэгэлгүй яах вэ. Гүр хааны дүрд тоглох боломж тэр бүр хүнд олдохгүй боломж шүү.
-УДЭТ-т жүжигчнээр орох гэсэн залуус олон. Танд энэ боломж хэр амар олдов?
-Би энэ театрт орсондоо маш их баярладаг. Энд урлагийн үйлдвэрлэл явагддаг болохоор залуу хүний хувьд сурах зүйл маш их. Төрийн шагналт, гавьяат жүжигчин Ц.Төмөрбаатар багшийн удирдлага дор хичээллэж байхаасаа театртайгаа холбогдож эхэлсэн. Мөн Түвшин багшийнхаа “Алтан унага” театрт ажиллаж байлаа. Тэр үед Түвшин багш ‘УДЭТ-т театр студи нээгдэх гэж байна. Түүнд бэлд. Монолог, дуу, жүжгээр шалгалт авах юм гэнэ” гэж хэлсэн. Тэгээд л шалгуулж орсон доо.
-Хэдэн он гэсэн үг вэ?
-2006 он.
-“Дэв” кино таны хэд дэх бүтээл вэ?
-Хоёр дахь. Өмнө нь “БНМАУ-ын төлөө зүтгэе” нэртэй кинонд тоглосон.
-Урлагт орсноор таны амьдралд хамгийн түрүүнд юу өөрчлөгдөв?
-Юу өөрчлөгдөх вэ дээ. Байгаагаараа л байна шүү дээ. Хамгийн гол нь би дуртай ажлаа хийгээд явж байгаа минь маш их аз жаргал юм даа. Би энэ мэргэжилдээ хоёрдугаар курсээсээ эхэлж дурласан. Жүжигчний мэргэжил гэдэг ийм байдаг юм байна гэдэг амтыг мэдэрч эхэлсэн. Би танд оюутан байхдаа тохиолдсон хөгжилтэй зүйлээ ярих уу.
-Тэг л дээ?
-Гавьяат жүжигчин Д.Баадайжав багш маань нэг удаа надад дуурийн дууны хичээл заав. Тэгэхээр нь би “Багш аа, би жүжигчин болох гэж байгаа юм чинь дуулах хэрэгтүй биз дээ” гэсэн чинь түүнээс хойш надтай нэг их дуугарахаа больсон. Дасгал ч уншуулахаа байв. “Багшийгаа гомдоочих вуу даа” гэсэн бодол ч төрөв. Ингээд сар гаруйн дараа би “Багш аа, надаар дасгал уншуулахгуй юм уу. Сүүлийн үед хоолойн дасгал ерөөсөө хийсэнгүй шүү дээ” гэсэн чинь “Жүжигчин болох хүнд энэ дайны хоолой хаваасаг” гэж надаас хариугаа авдаг байгаа.
-Уг нь дэмжээд байдаг...
-Харин тийм ээ.
-Оюутан байхдаа драмын жүжиг үздэг байв уу?
-Нэг их үздэггүй байсан. Тухайн үед одоогийнх шиг дураараа орж гардаггүй байсан юм чинь.
-Та одоо ямар дүрд тоглохыг хүсч байна вэ?
-Түүхэн талдаа дүр бол дуртай л байна. Ер нь дотроо төлөвлөчихсөн. Гэхдээ одоо хэлэхгүй. Хамгийн гол нь надад сурах зүйл маш их байна.
-Гэр бүлээ танилцуулаач?
-Манай эхнэрийг Бямбажав гэдэг. Хүү, охин хоёртой.
-Та ямар машин хөлөглөж байна вэ?
-Нэг машин бий. Таван жил унаж байна. Удахгүй солих л санаатай.
-Таныг хүмүүс овортой гэдэг. Санал нийлэх үү?
-Нийлнэ. Багаасаа овортой байсан юм. Ямар сайндаа “Үлэмжийн чанар” дуулалт жүжгийн хоёр тоглолтод Дулдуйтад гарах вэ дээ. Ардын жүжигчин П.Цэрэндагва ахын аав болж шүү дээ. Тэгэхээр овортой байгаа биз дээ.
-Таныг харахад спортлог биетэй харагддаг. Спортоор хичээллэдэг үү?
-Театрт орохоосоо өмнө маршд гүйдэг байлаа. Өнгөрсөн жил манай театр фитнес клубтэй болсон. Тэгэхэд таван сар тасралтгүй хичээллэсэн шүү.
-Та үг цөөтэй талдаа юм?
-Хүн өөрийгөө тодорхойлохгүй шүү дээ. Миний эргэн тойрныхон л хэлэх байх.
Өрдийн шуудан
Сэтгэгдэл (4)