Ерөнхий сайд асан Н.Алтанхуягийн төрсөн дүү Н.Наранцэцэгийг Герман улс руу эмчилгээнд явах гэж байхад нь саатуулан хорьсон. Тодруулбал, энэ сарын 16-ны орой 21 цагийн үед  ШШГЕГ-ын харьяа цагдан хорих 461 дүгээр ангид саатуулсан юм. 

Түүнд Эрүүгийн хуулийн тусгай ангийн 153, 263-ийн 2 буюу Төрийн өндөр албан тушаалтан эрх мэдлээ хэтрүүлэн ашигласан гэх үндэслэлээр буруутгажээ. Түүнчлэн найман цагийн турш өмгөөлөгчтэй нь уулзуулахгүй, хоол ундгүй эрүүдэн байцаасан тул ХЭҮК-т хандана гэдгээ ч мэдэгджээ.

Н.Наранцэцэгийн өмгөөлөгч О.Чулуунцэцэг “Миний үйлчлүүлэгч нэг ч хоног өдөр секунд ч төрийн албанд ажиллаж үзээгүй хүн. Гэтэл Төрийн өндөр албан тушаалтан эрх мэдлээ хэтрүүлэн ашигласан гэсэн зүйл ангиар эрүүгийн хэрэг үүсгэн шалгаж эхэллээ. А компанийн авсан тендерийн мөнгөөр иргэн Н.Наранцэцэг барилга барихдаа ашигласан байж магадгүй гэсэн үндэслэлээр хорьж байгаа. Гэтэл иргэн Н.Нарантуяа нь тэр яригдаад баригдаад байгаа барилгын захиалагч нь биш. Захиалагчийн эхнэр нь байгаа. Хаа хамгаагүй А компанийн авсан тендерийн мөнгө иргэн Н.Наранцэцэгийн барилга руу орсон гэдэг үндэслэл гаргаж ирээд хорьж байгаа нь үндэслэлгүй асуудал юм" гэлээ.