Монголын чөлөөт бөхийн холбооны үйл ажиллагаа, шийдвэрийг эсэргүүцэн энэ сарын 19-ний өдөр зулын гол болно хэмээн мэдэгдээд буй дасгалжуулагч Ц.Цогтбаяр болон Монголын чөлөөт бөхийн холбооны дасгалжуулагч багш нар, эрэгтэй, эмэгтэй шигшээ багийн тамирчид өнөөдөр мэдээлэл хийлээ.

Энэ үеэр дасгалжуулагч Ц.Цогтбаяр "Бид 2013-2016 онд Чөлөөт бөхийн эрэгтэй шигшээ багийг дасгалжуулж байх хугацаандаа чамгүй амжилт гаргасан. Энэ бүх зүйлээ энэ нөхдийн яриад байгаа өргөтгөсөн хуралд сууж, тайлангаа тавих ёстой байдаг. Энэ асуудлуудаа хэлж, тайлангаа тавиад, зөв буруу, цаашид хэрхэн өөрчилж шинэчлэх асуудлаа яримаар байна гэхэд хуралд оруулахгүй ээ гэж байна.  Мөн энэ хуралд Монгол улсын Гавьяатууд орох эрхтэй байдаг, та нар миний Гавьяат цолыг хурааж аваагүй байгаа юм чинь би ормоор байна”  гэхэд ч оруулахгүй л гэсэн. Ер нь Монголын чөлөөт бөхийн эрэгтэй бөх болон зарим амжилт гаргасан охидыг хүртэл хавчин гадуурхдаг. Энэ хугацанд медаль авсан тамирчдынхаа дуу хоолойг яагаад сонсохгүй байгаа юм бэ, яагаад энэ тамирчдаа хүртэл их хуралдаа оролцуулахгүй байгаа юм бэ. Энэ асуултуудыг асуухаар Удирдах зөвлөлөөс тийм тийм хүмүүсийг л хуралд оруулна гээд нэр заачихсан байгаа гэдэг. Удирдах зөвлөл хэн хэнийг оруулах юм гэдгийг бид нар мэдэхгүй гээд хэлэхгүй байгаа юм.

Монгол улсын Үндсэн хуулийн 16.16-д “Үг хэлэх, үзэл бодлоо илэрхийлэх” тухай заасан байдаг. Энэ бүрэн эрхээ эдлэж би өчигдөр Монголын ЧБХ-ны Ерөнхий нарийн бичгийн даргын өрөөнд байгаа улсуудад “Та нар энэ хууль бус үйл ажиллагаагаа зогсоохгүй бол тэмцлийн хурц хэлбэрт шилжинэ” гэдгээ хэлсэн.

Тэгэхэд холбооны Ерөнхий нарийн бичгийн дарга “Чиний яаж тэмцэж, яаж шатах чинь надад хамаагүй” гээд гараад явсан. МЧБХ-ны Ерөнхий нарийн бичиг дарга өөрөө хуурамч визний хэргээр шүүхээс ял авсан хүнээ ажиллуулаад байгаа мөртлөө 36 жил тасарсан медалийг эх орондоо авчирах гэж эцсээ хүртэл тэмцсэн хоёр дасгалжуулагчийг үгүйсгэж байгаа нь харамсалтай. Энэ бүхнийг хаацаалайх гэж биднийг хуралд оролцуулахгүй байна. Маш хүнд байна. Монголын чөлөөт бөхийн холбооны удирдлагууд гээд байгаа нөхөд тамирчин, дасгалжуулагчдынхаа үнэн дуу хоолойг сонсохгүйгээр, төрийн тусгай хамгаалалт авч, төрийн тусгай ордонд өөрсдийн захиалгат хүмүүсээ авчирч хурлаа хийхээр төлөвлөсөн байна. Иймээс л би тэмцлийн хурц хэлбэрт ортлоо өөрийгөө шатаана гэж хэлсэн байр суурин дээрээ хэвээрээ байгаа. Эд хэрвээ Төрийн ордонд тамирчин, дасгалжуулагчдыг оруулахгүй хурлаа хийвэл Төрийн ордны урд би “зулын гол” болоход бэлэн байгаа гэдгээ дахин сануулъя. Учир нь бөхийн спорт бол ард түмний хайртай спорт болохоос А.Сүхбат, Д.Сумъяабазар гэх мэт ганц хоёр хүний өмч бишээ. Тэд хууль тогтоох байгууллага, УИХ-д сууж байгаа улс байж яг бодит амьдрал дээр тэд өөрсдөө хуурамч бичиг баримт үйлдэж, холбоог нууцаар хувьдаа авч, олон багш дасгалжуулагчдыг хохироож байна. Бид хууль хяналтын байгууллагад хүсэлт тавихад А.Сүхбат, Д.Сумъяабазар нар бүгдийг нь хааж, бүгдийг нь дээрээс болиулж байна. Миний хүчин мөхөсдөж байна, Монгол Улс ийм л болчихсон юм байна" хэмээсэн юм.