Улс төрчид, төрийн албан хаагчдын нойрыг хулжааж, зарим нэгний алгыг загатнуулж байгаа шинэ Засгийн газрын сайдын албан тушаалд хэн суух вэ гэдэг эхнээсээ тодорч байна. Өчигдөр МАХН-МҮАН-ын “Шударга ёс” эвсэл болон АН-ынхан хэлэлцээрийн ширээний ард сууж хэн хэн бялуунаас хуваалцах тухай ярилцсан. Тэд хэлэлцээр дуусаагүй байхад тэнд яригдсан асуудлыг гадагш гаргахгүй гэж байсан. Гэсэн ч 24tsag.mn-ий эх сурвалж тэнд яригдсан халуун ярианы зах зухаас мэдээлсэн юм.
    Өчигдөр “Шударга ёс” эвсэл, АН-ынхан шинэ Засгийн газарт хаанаас хэн орох талаар урьдчилсан байдлаар ярилцжээ. Энэ жил Засгийн газрын бүрэлдэхүүнийг өөрчилж Хууль зүй, дотоод хэргийн яамыг Хууль зүйн яам, Дотоод хэргийн яам болгон салгаж, Эрдэс баялаг эрчим хүчний яамыг мөн Эрчим хүчний яам болон Эрдэс баялагийн яам болгох гэнэ. Мөн ЗТБХБ-ын яамыг ЗТХБ болон Үйлдвэрлэл, Хөдөө Аж Ахуйн Яам болгож, НХХЯ-ыг Нийгмийн хамгааллын яам, Хөдөлмөрийн яам болгох гэх мэт өөрчлөлт хийхээр ярьж байгаа аж.

   Эх сурвалжийн мэдээлснээс үзвэл өмнө нь яригдаж байсан хувилбараас арай илүү сайдын  суудлыг “Шударга ёс” эвсэлд өгөхөөр ярилцсан байна. Тухайлбал Сангийн сайдад МҮАН-ы дарга М.Энхсайхан, Эрүүл мэндийн яаманд Н.Удвал, Эрчим хүчний яаманд М.Сономпил, Дотоод хэргийн яаманд Л.Цог нарын нэрийг зоожээ. Батлан хамгаалахын яаманд Н.Батцэрэг, М.Сономпил нарын аль нэгийг томилох хувилбар мөн гарчээ. Харин Аялал жуулчлал, соёл урлаг, Биеийн тамир спортын салбарыг МАХН-д өгөх аж.
   Тэгвэл АН-ын талаас Засгийн газрын хэрэг эрхлэх газрын даргаар Ч.Сайханбилэг тодорч байна. Сонгуульд АН олон суудал авсныг зарласан цагаас хойш түүний нэр энэ албан тушаалд яригдаж эхэлсэн юм. Мөн Хууль зүйн яамны сайдаар томилогдох байх гэж олон нийт хүлээж байгаа УИХ-ын гишүүн Х.Тэмүүжинд энэ салбарыг хариуцуулахаар ярьсан гэв. Ерөнхий сайд болохоор зүтгэж байсан гэх УИХ-ын гишүүн Х.Баттулга хуучин ЗТБХБ-ын яамыг салгаж бий болгох Үйлдвэржилт, Хөдөө аж ахуйн яамны сайдад бичигджээ. Түүнийг өмнө нь энэ салбарыг хуриуцаж байхдаа дуусгаагүй ажлаа хийх боломж олгож байгаа нь энэ гэлээ. Харин ЗТХБ-ын салбарыг А.Гансүхэд, Эрдэс баялагийн салбарыг дэд сайд асан Б.Ариунсанд өгөх гэнэ.

   Эдгээрээс гадна өчигдрийн хэлэлцээрээр Батлан хамгаалахын сайд байсан Лу.Болд салбараа сольж Гадаад хэргийн яамны сайдаар ажиллах магадлалтай болжээ. Мөн Боловсролын сайдаар Лу.Гантөмөр гишүүнийг томилъё гэсэн ч тэрбээр энэ салбарт тэгтлээ их дурлахгүй байгаа гэж эх сурвалжууд мэдээлсэн. Харин НХХЯ-аас "төрөх" гэж байгаа Нийгмийн хамгаалалын яамыг Ц.Баярсайханд, Хөдөлмөрийн яаманд Ц.Оюунгэрэл очих нь.  Түүнд эхнээсээ ямар ч байсан нэг сайдын суудал өгнө гэж саарал ордноор жиг жуг хийлцэж байсан нь үнэний ортой болж эхэлжээ. Мөн энэ жил Баян-Өлгий аймгаас ямар ч байсан нэг сайдтан гаргахаар болжээ. Тиймээс А.Бакейг БОАЖЯ-ны сайд болгох саналыг үндсэндээ дэмжиж байгаа гэв. 1992-1996 онд Тээврийн яамны сайд байсан Р.Сандалхаанаас хойш 16 жил үндэстний цөөнхөөс нэг ч сайд гарч ирээгүй, цөөн хэдэн дэд сайд томилогдож байсан юм.

   Ерөнхий сайд хэн байх вэ гэдэг нэгэнт тодорхой болсон энэ үед шадар сайд, тэргүүн шадар сайдын суудал ч бас эзнээ нэхэж байгаа. Тиймээс өчигдөр АН-ынхан, “Шударга ёс” эвслийнхэн хэлэлцээд УИХ-ын дэд дарга асан Г.Батхүүг шадар сайд, МАХН-ын дарга Ч.Улааныг тэргүүн шадар сайад томилохоор урьдчилсан байдлаар ярилцсан байна.
   Энэ мэт яамдын өөрчлөлт, сайдын томилгоо яригдсан ч цаана нь гомдолтой үлдэгсэд цөөнгүй байгаа. УИХ-ын гишүүн Н.Батбаяр, С.Эрдэнэ  гэх зэрэг ямар ч байсан нэг яаманд очно гэж зүүгдэх хүмүүс бас байгаа сурагтай.  Тиймээс “Шударга ёсны төлөөх” гэх эвслийн Засгийн газрын анхны хэлэлцээр болох бялуу хуваах яриа өнөөдөр ч ширүүн уур амьсгал дунд өрнөх нь. Өнөөдрийн хэлэлцээрээр сайд нарын нэрийг дахин ярилцах ч тийм ч их өөрчлөлт орохгүй гэдгийг эх сурвалж тодотгосон юм.

Шинэ Засгийн газрын гишүүдийн урьдчилсан байдлаар гарсан нэрс:

Шадар сайд Г.Батхүү
ЗГХГ-ын дарга Ч. Сайханбилэг
ДХЯ- Л. Цог
ХЗЯ- Х.Тэмүүжин
СЯ-  М.Энхсайхан
Эрчим Хүчний Яам- М.Сономпил
БХЯ- Н.Батцэрэг/ М.Сонинпил
ЭМЯ- Удвал
ЗТХБ-  А.Гансүх
Үйлдвэржилт,Хөдөө Аж ахуйн Яам-  Х.Баттулга
ГХЯ- Лу.Болд
Боловсрол- Лу.Гантөмөр
Аялал жуулчлал Соёл Урлаг  БТСпорт- МАХН
Нийгмийн Хамгаалал- Ц.Баярсайхан
Хөдөлмөрийн Яам Ц. Оюунгэрэл
Эрдэс Баялаг- Б.Ариунсан
БОАЖЯ- А.Бакей.