Баянзүрх дүүргийн 13-р хорооны “Эрүүл өсөх” өрхийн эмнэлэгийн их эмч Д.Янжинцэцэгтэй бага насны хүүхдүүдэд тохиолддог өвчлөлүүдийн талаар  ярилцлаа.

-Сайн байна уу? Юуны өмнө та өөрийгөө манай уншигчдад танилцуулаач
-Энэ өдрийн мэнд хүргэе. Намайг Дамдинсүрэнгийн Янжинцэцэг гэдэг. Би 1993 онд Анагаах ухааны их сургуулийг хүүхдийн их эмч мэргэжлээр төгссөн. Энэ мэргэжлээрээ 20 жил ажилласан. Үүнээс 19 жил өрхийн эмнэлэгт ажилласан байна.

-Энэ жил бага насны хүүхдүүд халдварт өвчнөөр өвчлөх нь хэр байна вэ?
-2011 онтой энэ жилийг харьцуулахад харьцангуй бага байгаа боловч тодорхой хэмжээгээр шар, гахайн хавдар, нүдний ханиад мөн улаан нүд, ороож зэрэг халдварт өвчин гарч байна. Он гарсаар 17-оос доош насны тэр дундаа эмэгтэй хүүхдүүд вирусийн гаралтай халдварт шар өвчин долоо гарсан байна. Мөн хагас жилийн байдлаар гахайн хавдараар 48 тохиолдол бүртгэгдээд байна. Үүнээс найм нь насанд хүрсэн хүн байгаа бол бусад 40 нь 17-оос доош бага насны хүүхдүүд байгаа юм. Харин нүдний ханиад, ороож, улаан нүд зэрэг өвчнүүд нь дээрх хоёр өвчнийг бодвол бага байгаа.

-Танай “Эрүүл өсөх” өрхийн эмнэлэгт өдөртөө хичнээн хүн хандаж үйлчлүүлдэг вэ?
- Манай хороонд нийт 2200 өрх хамрагддаг. Өдөрт дунджаар 35-40 хүн ямар нэг байдлаар эмчилгээ, үйлчилгээ авч байна. Эдгээр хүмүүсийн ихэнх нь насанд хүрээгүй буюу  бага насны хүүхдүүд байгаа юм. 

-Эдгээр вирусийн гаралтай халдварт өвчин нь ямар замаар халдварладаг вэ?
-Гахайн хавдар нь шүлс мөн агаар дуслаар дамжин халдварладаг. Өнгөрсөн хавар тэр тусмаа сургууль, цэцэрлэг орж байсан энэ үед өвчлөл илүү өндөр байсан. Учир нь хүүхдүүд олноороо нэг анги  танхимд хамт байдаг. Энэ нь нөгөөдөө халдвар тараах нөхцөлийг бүрдүүлдэг. Ер нь эдгээр өвчин бүгд ахуйн замаар болоод агаар дуслаар  халдварладаг. Тиймээс эцэг эхчүүд аль болох хүүхдүүддээ илүү анхаарал тавьж, ариун цэврийг сайтар сахиулах хэрэгтэй байна.

-Ямар  шинж тэмдэгээр илэрдэг вэ?
-Гахайн хавдар хүрсэн үед  нэлээд өндөр халуурна. Мөн хавдар бий болдог бол нүдний ханиад хүрсэн үед нүд улайх, хорсох,  нуух маш ихээр гарах  зэрэг энгийн шинж тэмдэг илэрдэг. Эдгээр вирусийн гаралтай өвчин хүрч буй хүүхдүүдийн ихэнх нь дархлаа муу, бие сульдаа байдаг. Тиймээс  витамин C өндөр тунгаар уулгах хэрэгтэй.
 
 -Нэгэнт эдгээр өвчнөөр өвчилсөн үед хэрхэн эмчлэх вэ?
-Эцэг эхчүүд өглөө гараад орой ажлаасаа ирдэг. Энэ байдал нь хүүхдээ өвдсөнийг эхэн үед нь мэдэхгүй хүндрүүлэх нь элбэг байдаг. Тиймээс ихэнх үед нэлээн өндөр халуунтай мөн хавдсан, улайсан нүдтэй болсон үед нь  хүүхдээ өрхийн эмчид үзүүлдэг. Эдгээр халдварт өвчин нь доод тал нь 14 хоног эмчийн заавраар эмчлэх шаардлагатай. Юун түрүүнд ахуйн хэрэглээг нь гэр бүлийн бусад гишүүдээс тусгаарлах нь чухал. Харин хүндэрсэн үед өрхөөс хэвтэх бичиг хийж өгөөд Халдвар судлалын үндэсний төв рүү явуулдаг. Хэт хүндэрсэн бол заавал хэвтэж эмчлүүлэх хэрэгтэй. Жишээ нь шар өвчний үед  хоолны дэглэм барих хэрэгтэй. Аль болох өөх тос бага хүнс хэрэглэх нь зөв юм. Учир нь элгийг гэмтээх магадлал их байдаг. Мөн нүдний ханиад хүрсэн үед  зохих эмчилгээ хийдэг. Энэ өвчин мөн л вирусийн гаралтай учир  A цикловер гээд тосыг нүдэндээ хавчуулах хэрэгтэй энэхүү тосыг хэрэглэхээс өмнө хоёр буюу дөрвөн цагийн хугацаатайгаар нүдээ угаах хэрэгтэй. Түүнчлэн Диксиметозон хэмээх дусаагуур нь нэлээд үр дүнтэй байдаг. Эхний өдөр хоёр цагийн зайтайгаар, харин хоёр дахь өдрөөс дөрвөн цагийн зайтай хоёр дуслаар дусааж өгнө. Дусаалгандаа аргаж хорсдог учир Дитроциклинтой тосыг өдөрт гурван удаа нүдэндээ хавчуулах хэрэгтэй .

-Ямар үед хүндэрсэн гэж үзэх вэ?
-Эрэгтэй хүүхдийн хувьд төмсөг нь хавдсан үед шууд эмнэлэгт хэвтүүлдэг. Ийм үед цаг тухайд нь эмчлүүлэхгүй бол цаашдаа үргүй болох тохиолдол байдаг. Мөн нойр булчирхайн үрэвсэл бий болж болдог. Энэ үед хүүхэд ихээр бөөлжих, хэвлийгээр хатгуулж өвддөг. Харин эмэгтэй хүүхдийн хувьд мастид буюу хөхний үрэвсэл эсвэл өндгөвчний үрэвслээр хүндэрч болдог эдгээр тохиолдолд зайлшгүй хэвтүүлж эмчлүүлэх хэрэгтэй. Иймээс эцэг эхчүүд аль болох бага насны хүүхдээ анхаарч, гэр бүлийн ахуйн хэрэглээ болох наад захын аяга , халбага, алчуур зэргийг тус бүрдээ хэрэглэж сурах нь зөв юм.