Өчигдөр Багдад хотын ойролцоо ширүүн тулаан болж, цагдаагийн болон аюулгүй байдлыг хамгаалах албаны ажилтнууд олноороо амь үрэгдсэн байна. Дайтагч талуудын тулаан Багдадаас гадна Иракийн бусад хот тосгонд ч газар авчээ.
Албаны эх сурвалжийн мэдээллэж байгаагаар өнгөрсөн ням гаригаас өчигдөр хүртэл үргэлжилсэн тулааны дараа доод тал нь  100 гаруй хүн амь үрэгдсэн байна. Амь үрэгдсэн хүмүүсийн дийлэнх нь аюулгүй албаны ажилчид, цагдаа нар байжээ.
Багдадаас умард зүгт 20 км-т орших Тажи дүүргийн нутаг дэвсгэрт Санничууд болон Шийт Исламын шашинтнуудын мөргөлдөөн даамжирч, 41 хүн амиа алдсаны 14 нь цагдаа байсан байна. Өчигдрийн байдлаар Иракийн нийт нутаг дэвсгэрт 200 гаруй хүн шархадсан байгаа юм.
   Багдадаас гадна бусад 19 хот тосгонд дайтагч талууд тулалджээ. Шийт шашинтнууд зонхилон оршин суудаг Садр хотод л гэхэд тулааны үеэр 16 хүн амь үрэгдсэн байна. Зэвсэгт дайчид цагдаагийн пост, шалган нэвтрүүлэх цэгүүдийг удаа дараа бөмбөгджээ. Газрын тосны баялаг орд бүхий умард Киркук хотод таван автомашинтай тэсрэх бөмбөг дэлбэрч, есөн хүн амь эрсэдсэний зургаа нь армийн албан хаагч байсан байна. Мөн Дияала, Сайдияа, Дибис, Самарра болон бусад хотуудад байдал ижил байна.
   2003 онд АНУ Иракийн дайныг эхлүүлснээс хойш дайтагч талуудын тулаан болон, исламчуудын алан хядах ажиллагаа газар авч, эмх замбараагүй байдал ноёлсон. АНУ-ын ерөнхийлөгч Барак Обама өнгөрөгч онд Иракийн дайныг дуусгаж, цэргүүдээ татсан ч байдал дээрдээгүй хэвээр үлдсэн юм. Он гарснаас хойш 250 орчим хүн амь үрэгдсэн гэх мэдээ байна.