МАХН-МҮАН-ы “Шударга ёс” эвслийн зарим гишүүд хэвлэлийн бага хурал зарлаж МАХН-ын дарга Н.Энхбаярт дөрвөн жилийн ял оноосонтой холбоотойгоор байр сууриа илэрхийллээ. УИХ-ын гишүүн З.Баянсэлэнгэ, хуульч Н.Эрдэнэжамъяан, Н.Энхбаярын туслах Б.Тулга нар эвслийн Удирдах зөвлөлийн хуралд ямар байх суурьтай оролцох талаараа мэдээллээ. Гэсэн ч тэдний байр суурь хоорондоо зөрчилтэй байсан юм.
З.Баянсэлэнгэ: Намууд шийдвэртээ үнэнч байх ёстой. Нэг хүний асуудлаас улсын ажил чухал- Монголын ард түмэн сүүлийн 3 хоног хууль хэрэгжүүлэгч байгууллага яаж ажилладгийг харлаа. Нүдээ цавчилгүй эцсийн шийдвэр яаж гарах вэ гэдгийг хүлээж суулаа. Өнөөдөр хэвлэлийнхэн байгаагүй бол Н.Энхбаяр үнэхээр гэм буруутай байжээ гэж иргэд бодох байсан. Гэмт хэргийн бүрэлдэхүүн байхгүй, хохирогч байхгүй ийм хэрэгт хүнийг ял тулгаж байна гэдэг сүүлийн 22 жилд Монголд хуулийн тогтолцоо илт гажуудсаны илрэл. Улсын прокурор, хэн нэгэн улс төрийн албан тушаалтан энэ хүн гэм буруутай гээд шүүхээс өмнө хэлж байна. Монгол улсын ерөнхийлөгч байсан хүнд, сүүлийн 2 жил идэвхитэй байсан улс төрийн хүчинд нөлөөлсөн энэ хэлмэгдүүлэлт дараа өөр нэг хүн дээр давтагдахгүй байх арагагүй. Бид Н.Энхбаярын хэлмэгдүүлэлт гэж яриагүй, улс төрийн хэлмэгдүүлэлт гэж ярьж байгаа.
- Н.Энхбаярыг АН хэлмэгдүүлсэн гэж үзэж байна уу?
- Тухайн үеийн эрх баригч нартай холбож ойлгоно уу гэхээс өнөөгийн эрх баригч нар биш шүү дээ.
- Энэ асуудлаар Засгийн газарт орохгүй гэж барьцаалах гэж байна гэсэн яриад гараад байгаа?
- Төрийн албыг барьцаалж болохгүй. Энд хувь хүний асуудал ярьж байна. Намууд гаргасан шийдвэртэй үнэнч байх ёстой. Шийдвэрээ хүндэтгэж үзэх байх. Нэг хүний асуудлаас улсын ажил чухал. Харин энэ хүнд үед биднийг хагарах байх гэсэн яриа гараад байна. Зарим нь Засгийн газартай нийлж, зарим нь Засгийн газарт орохгүй гэж сална гэцгээж байна. Харин энэ нь манай хоёр намыг илүү эвтэй, нэгдэлтэй байх хэрэгтэйг харуулж байна.
Хуульч Н.Эрдэнэжамъяан: Даргыг нь аваад явчихсан тохиолдолд хамтарсан Засгийн газарт орох ёс зүй байхгүй шүү дээ.
- Улс төрчдийн захиалгаар ажилладаг байдлыг өөрчлөхийн тулд манай эвсэл мөрийн хөтөлбөртөө оруулсан. Хамгийн хамрамсалтай нь яг ийм зорилго тавьж байгаа улс төрийн хүчнийг хэлмэгдүүллээ. Яллах ёстой гэсэн байр сууриар хэргийг илт гуйвуулсан байна. Хэрэв аль нэг эрх баригч нам энэ чигээр хэлмэгдүүлэлтийг үргэлжүүлбэл манай гишүүдийн зүгээс хэрхэвч хүлээн зөвшөөрөхгүй. Цаашдаа Засгийн газар байгуулагдъя гэж байгаа бол хэлмэгдүүлэлтээ зогсоох ёстой, хууль зөрчихөө болих ёстой. Даргыг нь аваад явчихсан тохиолдолд хамтарсан Засгийн газарт орох ёс зүй байхгүй шүү дээ.
24tsag.mn
