Увс аймгийн Засаг дарга Э.Цасчихэр, ИТХ-ын дарга Д.Батсайхан нарын гомдлыг өнөөдөр Нийслэлийн шүүхийн давж заалдах шатны шүүхийн танхимд хэлэлцэж, дөнгөж сая дууслаа. Хурлаар тэдэнд ял оноосныг мөн хэргийг нэмж, тодруулах зүйл бий гэсэн үндэслэлээр нэмэлт мөрдөн байцаалтад буцаалаа. Тэднийг төсвийн мөнгө шамшигдуулсан хэмээн буруутгаж, анхан шатны шүүхээс 2-3 жилийн хорих ял оноосон юм. Хуралд илтгэгч шүүгчээр Нийслэлийн шүүхийн давж заалдах шатны шүүхийн Эрүүгийн танхимын дарга Б.Батцэрэн оролцов.
Э.Цасчихэрийг Увс аймагт барихаар төлөвлөсөн Нарийны голын 325 км, Тээлийн голын зам, гүүрийн барилгын ажлыг өөрийн “Мөнхжим” компаниар гүйцэтгүүлэхээр 710 сая төгрөг завшсан, төрийн албан хаагчдын таван давхар орон сууцыг дөрвөн давхар болгон барьсан гэх иргэдийн мэдээллээр АТГ-т шалгаж, Эрүүгийн хуулийн 263 дугаар зүйлд заасан төрийн албан тушаалтан албан тушаал эрх мэдлээ хэтрүүлж, онц их хэмжээний хохирол учруулсан гэсэн үндэслэлээр ялласан юм.
Б.Чимэг
