УИХ-ын чуулганаар АН-ын дарга Н.Алтанхуягийг шинэ ерөнхий сайдаар томилох асуудлыг хэлэлцэж, гишүүд саналаа хэлсээр байна. Шинэ парламент байгуулагдснаас хойш анх удаа чуулганы хуралд оролцож байгаа УИХ-ын гишүүн С.Бямбацогт "Өмнө нь цөөнх байгаагүй юм шиг хүч түрж битгий асуудалд хандаарай. Өнгөрсөн хугацаанд хийсэн, оносон, алдсан нь бид бүгдтэй холбоотой шүү. Ялангуяа Н.Алтанхуяг гишүүн таньтай их холбоотой. Өнгөрсөн Засгийн газарт та ч гэсэн байсан. Тийм болохоор өнгөрсөн үе рүүгээ битгий нулимаарай. Өнгөрсөн үе рүүгээ нулимбал эргээд тань руу үхэр буугаар буудна шүү. Тиймээс ямар муухай Засгийн газар байсан, юу идсэн уусан бэ гэж битгий хандаарай" гэв. Мөн "Та өмнө нь мөрийн хөтөлбөрөө хэрэгжүүлэхийн тулд хөөсөн ч гарахгүй гэж хэлж байсан. Гэтэл хөөгөөгүй байхад гараад явж байсан шүү. Нэг л зангаараа байгаарай. Цөөнх гэж манай намын мөрийн хөтөлбөрийг битгий гадуурхаарай. Бид намын мөрийн хөтөлбөрөө тусгахын төлөө ажиллана. Тэрийг дэмжээрэй" гэв.