Өнөөдөр Засгийн газрын ээлжит хурал болж ЦЕГ-ын шинэ даргыг томилсон тухай эх суравлж мэдээллээ. Цагдаагийн ерөнхий газрын даргын албан тушаалд Тагнуулын ерөнхий газрын даргаар ажиллаж байсан Б.Билэгтий томилжээ. Тэрбээр одоогоор Үндэсний аюулгүй байдлын зөвлөлийн Ажлын албаны даргаар ажиллаж байгаа юм. Б.Билэгтийг Хууль зүйн шинэ сайд Х.Тэмүүжинтэй гар нийлэх салбараа мэддэг хүн гэж үзсэн тул ийнхүү томилсон байна.Өндөр насны тэтгэвэрт гарах болсонтой нь холбогдуулан Цагдаагийн ерөнхий газрын дарга, хошууч генерал Д.Сандаг-Очирыг өнөөдрөөс ажлаас нь чөлөөлжээ.
Намтар: Баянмөнхийн Билэгт 1960 онд Хэнтий аймгийн Бэрх тосгонд төрсөн. 1978 онд Нийслэлийн 10 жилийн 5 дугаар сургууль, 1980 онд ЗХУ-ын Эрхүү хотын УААДС-ийн Санхүү, эдийн засгийн сургууль, 1988 онд МУИС, 1999 онд Отгонтэнгэр их сургууль төгссөн. Нягтлан бодогч-эдийн засагч, эрх зүйч мэргэжилтэй.
Улаанбаатар хотын Мах бэлтгэлийн конторт ачигч, ТЭЦ-2 цахилгаан станцад слесарь, “Сонсголон” элс, хайрганы завод, СОТ-2 барилгын трестэд нягтлан бодогч, Монголын Ардчилсан холбоо, “Ардчилал” сонинд улс төрийн ажилтан, сурвалжлагч, эрхлэгч, ХААҮЯ-ны Гадаад харилцаа, эрх зүйн газрын дарга, Монголын радио, телевизийн Хэрэг эрхлэх газрын дарга, Тагнуулын ерөнхий газрын дарга, Үндэсний аюулгүй байдлын зөвлөлийн Ажлын албаны даргаар ажиллаж байсан. Б.Билэгт төрийн албанд 12 жил ажилласан юм.
