Томоохон зах, худалдааны төвүүд НИТХ-аас баталсан цагийн хуваарийн дагуу ажиллаад удаагүй байгаа билээ. Иргэдийн ажил эхлэх болон тарах үетэй захуудын цагийн хуваарь давхцаж замын түгжрэл үүсэх нөхцөл бүрдэж байна гэж үзсэний улмаас цагийн хуваарьт эл өөрчлөлтийг хийгээд байгаа. Тэгвэл энэхүү өөрчлөлтийг наймаачид төдийлөн дэмжихгүй эсэргүүцэж байгаа юм. Нарантуул захын хувьд өдөр 12.00 цагаас үүдээ нээж, орой 21.00 цагаас хаалгаа барих ёстой байгаа. Гэтэл наймаачид өдөр 11.00 гэхэд аль хэдийнээ лангуун дээрээ бараагаа өлгөсөн харагдана. Тэгээд орой 20.00 цаг болуутай үгүйтэй л бараагаа хураагаад гэрийн зүг явцгааж байгаа юм.  Энэ нь ч аргаггүй биз. Эднийх шиг задгай талбайтай газар хэн ч харанхуйд бараа үзээд явж байх билээ.
Зарим нэг наймаачидтай уулзаж энэхүү цагийн хуваарийн өөрчлөлт тэдний наймаанд хэрхэн нөлөөлж байгааг асуухад,
 Хувцасны лангуу түрээслэгч: 12.00 цаг болгосон нь бөөн зардал, чирэгдэл тарьж байна
Бид чинь бараагаа ихэвчлэн л Хятад руу явж эрээнээс авдаг. Тэгээд өглөө эрт воганаасаа буугаад л лангуун дээрээ ирж шинэ бараанууд тавих шаардлагатай байдаг. Тэгж байж л ашигтай байна шүү дээ. Гэтэл өдөр 12.00 цагаас цугладаг  болгочихсон чин гэртээ очоод буцаж түгжирч гацаж явсаар зах руу ирнэ. Тэгээд өнөөх хэдэн бараагаа гаргаж тавих гэсээр байтал хамаг цаг явчихна.   Энэ чинь тэгээд бөөн зардал чирэгдэл болж байгаа байхгүй юу.

 Ганц наймаачид биш мөн хөдөө орон нутаг руу явдаг хийгээд хот хоорондын нийтийн тээврүүдийн жолооч маш их бухимдалтай байгаа гэнэ.
Жолооч нарын хувьд өглөө эрт ирээд зогсохоор цагдаа нар оруулдаггүй гэнэ. Тэгээд өдөр эд замын ачаалал, түгжрэлийн үеэр зах руу орно гэдэг бол хэцүү.  Үд болж байхад ирэхээр өнөөх жолооч нар хүнээ дүүргэх гэж орилсоор байтал нэг мэдэхэд өдөр өнгөрчихдөг гэнэ.
Үйлвэр Тэц-3-ын чиглэлд явдаг жолооч: Хэдэн бор төгрөг олохын тулд өглөө эрт л хөдлөх хэрэгтэй байна шүү дээ
  Ер нь энэ замын түгжрэл арилгана гэсэн нэрийдлээр олон л хүн хохирч байгаа байхгүй юу. Автобуснуудад л ашигтай, түгжрэл, хүндрэл бага болж байгаагаас бид нарт ч энэ замын түгжрэл буураад байгаа юм харагдахгүй байна. Хэдэн бор төгрөг олохын тулд бид чин өглөө эрт хөдөлж орой оройтож бууж байж л хоногийн хоолныхоо хэдэн төгрөгтэй золгоно шүү дээ. Адаглаад Нарантуул дээр зогсож хүнээ ачдаг биднийг өөр газар очоод зогсохоор бөөн хэл ам болно.
 Энэ мэт хүндэр бэрхшээлүүд наймаачид төдийгүй жолооч нарт гарсаар байгаа гэнэ. Харин 07.00-15.00 цагийн хооронд ажиллаж байгаа "Хар хорин " захын наймаачид мөн л эсэргүүцэж байгаа юм байна. Энэ нь ч ойлгомжтой шүү дээ.