Шүүхийн шинэчлэлийн хүрээнд шүүхийн ил тод нээлттэй байдлыг хангах талаар олон ажил хийгдэж, шийдвэрийн цахим сангаас иргэд өөрсдийн хүссэн мэдээллээ авах боломжтой болоод байгаа.  
    Энэ хүрээнд орон нутгийн шүүхүүд ч зарим зүйлийг санаачлан хэрэгжүүлж байгаа ажээ. Тухайлбал, Баян-Өлгий аймгийн шүүхээр үйлчлүүлсэн иргэд өөрсдөө шүүхийн мэдээлэл, лавлагааны үйлчилгээг цахим хэлбэрээр авах боломжтой болсон байна. Иргэд шүүхийн үүдний хүлээлгийн танхимд байрлуулсан “touch screen” буюу мэдрэгчтэй дэлгэцийн тусламжтайгаар нэхэмжлэлийн хэлбэр, бүрдүүлбэр, улсын тэмдэгтийн хураамжийн тухай, давж заалдах болон хяналтын журмаар гомдол гаргах, шүүх хуралдааны зар гэх мэт мэдээллүүдийг авч болохоор болжээ.
    Энэхүү дэлгэцийн тусламжтайгаар шүүхэд нэхэмжлэл гаргасан иргэд нэхэмжлэл нь хэн гэдэг шүүгчид хэзээ хуваарилагдсан, хэрэг хянан шийдвэрлэх ямар ажиллагаа хийгдсэн, хэрэг хянан шийдвэрлэх ажиллагааны хугацаа зэрэг мэдээллүүдийг шүүхийн ажилтны тусламжгүйгээр өөрсдөө авах, уг дэлгэц интернэтийн сүлжээнд холбогдсон учир тус шүүхийн цахим хуудас, шүүхийн шийдвэрийн нэгдсэн цахим санд нэвтэрч, шүүн таслах болон шүүхийн захиргааны үйл ажиллагааны талаарх мэдээ мэдээллүүдийг авах, шүүхийн үйл ажиллагааны талаарх санал сэтгэгдлээ бичиж үлдээх боломжтой аж.
    Ийнхүү “Мэдээлэл, лавлагааны өөрөө өөртөө үйлчлэх цэг”-ийг ашиглалтад оруулан шүүхийн нээлттэй байдлыг хангаснаар шүүхээс иргэдэд үзүүлэх мэдээлэл, лавлагааны үйлчилгээ улам ойртож, ойлгомжтой болсон байна.