Өчигдөр 18.00 цагийн үед Баянгол дүүргийн нэгдүгээр хороо, Шастины нэрэмжит III эмнэлгийн баруун талд баригдаж буй барилгад бетон зуурмаг шахаж байсан кран осолдсоны улмаас ойролцоох замын гарцаар гарч явсан 12 настай хүүхдийн дээрээс нурж амь насыг нь хохироосон хэрэг гарсан талаар мэдээлсэн. Ослын газарт Онцгой байдлын албаныхан болон Баянгол дүүргийн Замын цагдаагийн тасгийнхан, Шүүхийн шинжилгээний хүрээлэнгийнхэн ажилласан. 12 настай охин хичээлээ тараад ээж, эгч хоёртойгоо зам хөндлөн гарч яваад ийнхүү амиа алдсан юм. Уг хэрэгт тус зуурмагны машины жолоочийг барьж, шалгаж эхэлсэн байна. Зуурмаг шахагч машины тулгуур газарт цөмөрсний улмаас осол гарсан юм. Уг осолтой холбогдуулан 16.00 цагаас НИТХ-ын дарга Д.Баттулга мэдээлэл хийхээр болжээ. Хурал Тамгын газрын нэгдүгээр давхарт болох юм байна.