Өчигдөр 18.00 цагийн үед Баянгол дүүргийн нэгдүгээр хороо, Шастины нэрэмжит III эмнэлгийн баруун талд баригдаж буй барилгад бетон зуурмаг шахаж байсан кран осолдсоны улмаас ойролцоох замын гарцаар гарч явсан 12 настай хүүхдийн дээрээс нурж амь насыг нь хохироосон хэрэг гарсан талаар мэдээлсэн. 12 настай охин хичээлээ тараад ээж, эгч хоёртойгоо зам хөндлөн гарч яваад ийнхүү амиа алдсан юм. Зуурмаг шахагч машины тулгуур газарт цөмөрсний улмаас осол гарсан билээ. Уг осолтой холбогдуулан НИТХ-ын дарга Д.Баттулга болон холбогдох газрын дарга нар өнөөдөр мэдээлэл хийж, талийгаачийн ар гэрийнхэнд эмгэнэл илэрхийлэн, албан ёсоор уучлал хүсэв. Мөн тухайн компани барилга барих зөвшөөрөлгүйгээр үйл ажиллагаа явуулж байсан. Мөн барилгын зуурмаг шахагч кран техникийн бичиг баримтгүй байсан талаар мэдээлэв. Тиймээс нийслэлийн  удирдлагын зүгээс нэн даруй үйл ажиллагааг нь зогсоох арга хэмжээ авч ажиллахыг  холбогдох албаныханд үүрэг болгосон байна.  Мөн уг компанийг шүүхэд өгөх болсноо мэдэгдэв.