МАН-аас Сонгинохайрхан дүүргийн 26 дугаар тойрогт нэр дэвшигч, Хөрөнгө оруулалтын банкны Төлөөлөн удирдах зөвлөлийн дарга  Д.Сумъяабазарыг бусдыг залилан, их хэмжээний хохирол учруулсан хэргээр Сүхбаатар дүүргийн цагдаагийн хэлтсээс шалгаж эхэлсэн талаар мэдээлсэн. Түүнийг бусдын 350 мянган ам.долларыг залилсан байж болзошгүй хэмээн шалгаж байгаа юм байна. Харин энэ талаар Д.Сумьяабазар “Би ямар ч залилан хийгээгүй. Би зөвхөн хөрөнгө оруулалт хийсэн. Тэр мөнгийг өөр хоёр хүн залилсан. Тиймээс цагдаагийн байгууллагаас намайг гэрчээр дуудаж мэдүүлэг авсан. Би гэрчийн мэдүүлэг өгсөн. Уг хоёр хүнийг мөнгө залилсан гэдгийг цагдаагийн байгууллагаас тогтоосон гэж байна. Хуулийн байгууллага удахгүй энэ асуудлыг шийдэх байх. Ямар ч баримтгүй мэдээлэл гаргасан мэдээллийн байгууллагыг хуулийн байгууллагад өгнө” гэлээ. Гэвч залилсан гэх хоёр хүн нь Д.Сумьяабазарын гарын үсэгтэй баримтаар уг мөнгийг авсан байна. Хэргийн талаар эргэн мэдээлэх болно.